दशैँअघि काठमाण्डूमा मेलम्चीको पानी आउन सक्ने सम्भावना न्यून
प्रकाशित मिति : जेष्ठ २०, २०७५ आईतबार
मेलम्ची खानेपानी आयोजनाबारे सरकार र ठेकेदार कम्पनीबीच विवाद बढेसँगै दशैँअघि काठमाण्डूमा मेलम्चीको पानी आउन सक्ने सम्भावना घटेको अधिकारीहरूले बताएका छन्।
सम्झौतामा उल्लेख गरिएभन्दा बढी काम गरेको भन्दै ठेकेदार कम्पनीले डेढ अर्ब रूपैयाँभन्दा बढी थप रकम दावी गरेपछि दुवै पक्षबीच विवाद बढेको हो।
सोही कारणले पछिल्लो समय झण्डै एक महिनाभन्दा लामो समयदेखि आयोजनाको काम प्रभावित भएको बताइन्छ।
मेलम्ची खानेपानी आयोजनाको मुख्य भाग ‘रिभरमा’ भन्ने स्थानमा सम्झौता गरिएभन्दा बढी माटो खन्नुपरेपछि ठेक्काको जिम्मा लिएको इटालियन ठेकेदार कम्पनी सीएमसीले सम्झौतामा उल्लेख गरिएभन्दा बढी रकम दावी गरेको थियो।
आशङ्का
मेलम्ची विकास समितिले भने उक्त कामलाई इन्जिनियरको हिसाब अनुसार २८ करोड रूपैयाँ मात्रै थपिदिएपछि ठेकेदार कम्पनी आश्वस्त नहुँदा काम प्रभावित हुँदै आएको छ।
विवाद सल्टाउन भन्दै ‘डिस्प्युट बोर्ड’ मा पुगेको उक्त विषयको अन्तिम फैसला आगामी बुधवार हुने ठानिएको छ।
त्यसले आगामी दशैँअघि नै काठमाण्डूमा खानेपानी आउन सक्नेमा आयोजनाका प्रवक्ता राजेन्द्र पन्तले आशङ्का व्यक्त गरे।
उनले भने, “हेड बक्स खन्दा सम्झौतामा ३२ हजार घनमिटर थियो। पछि डाँडा नै काट्नुपर्दा एकलाख घन मिटर माटो खन्नुपर्यो। त्यसका लागि ठेकेदार कम्पनीले डेढ अर्ब बढी मागेको छ। हामीले २८ करोड थपिदियौँ। त्यसमा कम्पनी अलमलिएको छ। त्यसले काम प्रभावित भएको हो।”
तर खानेपानी मन्त्रालयले भने रकम विवादबारे जस्तो निर्णय भए पनि त्यसले काम भने प्रभावित हुन नहुने भन्दै रोष प्रकट गरेको छ।
व्यवस्थापन
सरकारले ठेकेदार कम्पनी सीएमसीको इटालीस्थित उच्च व्यवस्थापनलाई पत्र लेखेरै निर्धारित समयमै काम पूरा गर्न निर्देशन दिएको जनाएको छ।
खानेपानी मन्त्रालयका सचिव कृष्णराज बीसी भन्छन्, “९० प्रतिशत काम भइसकेको छ। यो अवस्थामा काम रोक्न पाइँदैन। त्यसैले जसरी पनि काम गर्नुपर्छ। नत्र हामी उनीहरूको उच्च अधिकारी बोलाएर भए पनि काम गर्न वाध्य पार्नेछौँ।”
उक्त आयोजना सकिन अब अन्तिम चरणको १० प्रतिशत काम मात्र बाँकी रहेको सरकारले जनाएको छ।
दुई दशकदेखि चर्चामा रहेको मेलम्ची खानेपानीको निर्माण आयोजना पटक पटक रोकिँदै आए पनि दुई महिनाअघि सुरूङ खन्ने काम पूरा भएसँगै काठमाण्डूवासीमा आशा बढेको थियो।