पुटिनले गरे युरोपकै लामो क्रिमिया पुलको उद्घाटन
प्रकाशित मिति : जेष्ठ १, २०७५ मंगलबार
सन् २०१४ मा क्रिमियालाई रुसमा गाभेपछि सो स्थानलाई रुससँग जोड्न निर्माण गरिएको पुलको राष्ट्रपति भ्लादिमिर पुटिनले उद्घाटन गरेका छन्। फेबुअरी २०१६ बाट निर्माण सुरु गरिएको १९ किलोमिटर लामो सो पुल तोकिएको समयभन्दा ६ महिनाअघि नै निर्माणसम्पन्न भएको हो।
पुटिन आफैँले सो पुलमा ट्रक हाँकेर उद्घाटन गरेका हुन्। पुलले क्रिमियालाई रुसको क्रास्नादोव क्षेत्रसँग जोड्नेछ।
सो पुलको क्षमता दैनिक ४० हजार कार र ४७ जोडा रेल दौडनसक्ने रहेको जनाइएको छ। पुलको रेलमार्ग भने २०१९ मा खोलिनेछ।
करिब पौने ४ अर्ब डलरको लागतमा तयार भएको पुल युरोपकै सबैभन्दा लामो हुने जनाइएको छ।
यसअघि युक्रेनले नाकाबान्दी गरेपछि क्रिमियामा जलमार्गबाट मात्रै आपूर्तिको व्यवस्था हुँदै आएको थियो।