युएससीआईएसमा एसाइलम आवेदन दिएका नेपालीलाई टीपीएस घाँडो
युएससीआईएसमा सकारात्मक एसाइलम आवेदन दिएका कैयन नेपालीहरुलाई अमेरिकी सरकारले प्रदान गरेको टीपीएस सुविधा घाँडो सावित भएको छ । टीपीएस लिएका आवेदकको एसाइलम युएससीआईएसले स्वीकृत नगरेको खण्डमा उनीहरुले अदालतमा जाने अवशर गुमाएका छन् ।
युएससीआईएसको एसाइलम अफिसले टीपीएसमा रहेका नेपालीका अस्वीकृत केस अदालतमा रिफर नगरेका कारण त्यस्ता आवेदकले अदालतमा आफ्नो तर्क अध्यागमन न्यायाधिससमक्ष राख्ने अवशर गुमाएका हुन् । जसले गर्दा युएससीआईएसमा एसाइलम आवेदन अस्वीकृत हुनेहरुका लागि आफूले पाएको टीपीएस निल्नु न ओकेल्नु भएको छ ।
टीपीएसमा रहेकाहरुको एसाइलम युएससीआईएसबाट अस्वीकृत भएको खण्डमा अन्य वैध स्टेटसमा रहेकाहरु सरह अस्वीकृती गर्ने आशयको सुचना दिइने गरिएको छ । यस्तो सुचना दिइएको १६ दिनभित्र आवेदकले आफ्नो आवेदनमा सहयोग पुग्ने थप प्रमाणहरु पेश गर्न सक्छन् । तर प्रमाणहरु पेश नगरेमा वा प्रमाणबारे एसाइलम अधिकारीले चित्त नबुझाएमा भने त्यस्तो केस अदालतमा रिफर नगरी सिधै अस्वीकृत गरिन्छ ।
युएससीआईएसमा एसाइलमका आवेदन रहेका टीपीएस प्राप्त नेपालीहरुको संख्या उल्लेख्य रहेको छ । जसमध्ये केहीले युएससीआईएसबाट एसाइलम अस्वीकृत हुँदा अध्यागमन अदालतमा जाने अवशर गुमाएका छन् ।
नेपालीका एसाइलमका सन्दर्भमा युएससीआईएसको तुलनामा अध्यागमन अदालतबाट स्वीकृति दर उच्च रहेको छ । आर्थिक बर्ष २०१८ को पहिलो ३ महिनामा अध्यागमन अदालतमा १४३ जना नेपालीका एसाइलम स्वीकृत गरिएको थियो भने जम्मा ४५ जनाका अस्वीकृत गरिएको थियो ।
