युएससीआईएसबाट एसाइलम अन्तरवार्ता विवरणको बुलेटिन बन्द
अमेरिकी सरकारको युएससीआईएसले कुन महिनामा कहिले केस फाइल गरेका व्यक्तिको अन्तरवार्ता लिइयो भन्ने विवरण सहितको बुलेटिन निकाल्न बन्द गरेको छ । सबैभन्दा पहिले एसाइलमका लागि आवेदन दिएका व्यक्तिको अन्तरवार्ता पहिले आउने पूरानो नियमलाई उल्टाएर सबैभन्दा अन्तिममा आवेदन दिएका व्यक्तिको एसाइलम अन्तरवार्ता सबैभन्दा छिटो आउने नियम लागु गर्दै एसाइलम अन्तरवार्ताको बुलेटिन बन्द गरिएको हो ।
एसाइलमको अन्तरवार्ता तय गर्ने प्राथमिकता बदलिएपछि दुईदेखि तीनबर्षदेखि एसाइलमको अन्तरवार्ता कुरेर बसेका आवेदकहरु निराश भएका छन् भने उनीहरुको अन्तरवार्ताको मिति अझ ढिलो आउने भएको छ । तर अहिले एसाइलमका लागि आवेदन दिनेहरुले भने तीनसाताभित्र एसाइलम अन्तरवार्ता कहिले हुने भन्ने मिति तय गरिएको पत्र प्राप्त गर्नेछन् ।
सन् २०१५ को जनवरीदेखि सन् २०१८ को जनवरीसम्म झण्डै ३ बर्षसम्म एसाइलमका सबैभन्दा पुराना आवेदकलाई क्रमश अन्तरवार्ताको मिति दिइदै आएको थियो । त्यो भन्दा अगाडि एसाइलमका आवेदकको अन्तरवार्ता मिति कम्प्युटरले र्याण्डम छनौट गर्ने भएकाले भाग्यमा आधारित रहेको थियो । कुनै आवेदकको अन्तरवार्ता तुरुन्तै आउन पनि सक्थ्यो भने कुनैको आउन बर्षौ पनि लाग्न सक्थ्यो ।
