अब अमेरिकामा एसाइलम अन्तरवार्ताको मिति २१ दिनमा, पछि फाइल गर्नेको अन्तरवार्ता अगाडि
अमेरिकी सरकारको युएससीआईएस अन्तरगत एसाइलम डिभिजनले एसाइलम आवेदकको अन्तरवार्ताको मिति आवेदन दिएको २१ दिनभित्र तय गर्ने जनाएको छ । युएससीआईएसले अन्तरवार्ताको मिति तय गर्दा सबैभन्दा पछाडि फाइल गरिएका एसाइलमका आवेदनलाई प्राथमिकता दिने भएको छ । वर्क परमिट प्राप्त गर्ने उद्देश्यलेमात्र एसाइलम फाइल गर्ने क्रम बढेपछि सरकारले नयाँ नीति बनाएको हो ।
यसरी पछाडि फाइल गरिएका एसाइलमका आवेदनमा तुरुन्तै अन्तरवार्ताको मिति तय गर्दा एसाइलम अस्वीकृत हुनेहरुलाई देशनिकालाको प्रकृयामा राखिहाल्न सजिलो हुने र एसाइलम पेन्डिङ रहेको आधारमा वर्क परमिट इस्यु गर्न नपर्ने भएकाले नयाँ नीति बनाइएको हो । अब वर्क परमिट पाउने उद्देश्यलेमात्र एसाइलम फाइल गर्ने परिपाटी समेत कम हुने युएससीआईएसले विश्वास लिएको छ । नयाँ विधिले एसाइलमका लागि योग्य हुने व्यक्तिको निर्धारण अझ प्रभावकारी तरिकाले गर्नमा मद्दत पुग्ने युएससीआईएसको विश्वास छ ।
अब एसाइलमको अन्तरवार्ता लिंदा अन्तरवार्ताको मिति लिइसकेका तर कुनै कारणवश आवेदकको अनुरोध वा युएससीआईएसको आवश्यकताले मिति सार्नुपरेकाहरुलाई पहिलो प्राथमिकता दिइनेछ । त्यस्तै त्यसपछि २१ दिन त्यो भन्दा कम समय आवेदन पेन्डिङ रहेकाहरुलाई अन्तरवार्ताका लागि दोश्रो प्राथमिकता दिइनेछ ।
तेश्रो प्राथमिकतामा नयाँ फाइल गरेको एसाइलमबाट पुरानो एसाइलमका आवेदनतिर अगाडि बढ्दै अन्तरवार्ताको मिति तय गरिनेछ । सिमा क्षेत्रबाट समातिनेहरुको अन्तरवार्ताको कार्यभारका कारण २१ दिनभित्र अन्तरवार्ताको मिति तय गर्ने योजनामा केही असर पर्नसक्ने युएससीआईएसले जनाएको छ ।
यदि कुनै आवेदनमा अझ छिटो अन्तरवार्ता गर्नुपर्ने भएमा एसाइलम अफिसका निर्देशकहरुले प्राथमिकता बाहेक पनि छिटो अन्तरवार्ताको मिति तय गर्न सक्ने जनाइएको छ । कुनै आवेदकलाई छिटो अन्तरवार्ता आवश्यक परेमा त्यसको कारण सहित आवेदन समेत दिन सकिनेछ ।
कुनै व्यक्ति एसाइलम अफिस वा एसाइलम सब अफिसभन्दा टाढा बस्ने भएमा त्यस्ता व्यक्तिको अन्तरवार्ता युएससीआईएसको फिल्ड अफिसमा समेत लिन सकिने जनाइएको छ । थप जानकारीका लागि यहाँ क्लिक गर्नुहोला ।
