अमेरिकी सेनामा सुचिकृत नेपालीसहितका आप्रवासीलाई देशनिकालाको जोखिम घटाउने विधयेक पारित
मंगलबार राष्ट्रपति डोनाल्ड ट्रम्पले हस्ताक्षर गरेको सैन्य खर्च सम्बन्धि विधयेकको एउटा प्रावधानले अमेरिकी सेनामा सुचीकृत आप्रवासीहरुका लागि अमेरिकाबाट देशनिकालाको जोखिमलाई कम गरेको छ । विधयेकले अमेरिकी सेनामा सुचीकृत भएर पृष्ठभूमी परिक्षणका लागि कुरिरहेकाहरुका लागि देशनिकालाको डरलाई कम गरेको छ ।
विधयेकमा अमेरिकी सेनामा सुचीकृत व्यक्तिलाई रक्षा सचिवले पृष्ठभूमी परिक्षणका लागि थप एकबर्ष दिनसक्ने प्रावधान राखिएको छ । यसअगाडि २ बर्षको प्रतिक्षा अवधि राखिएपनि सन् २०१६ को सुरक्षा जाँचबारेको नयाँ मापदण्डले प्रमाणिकरण प्रकृयालाई निकै सुस्त बनाएपछि पेन्टागनले गत डिसेम्बरमा आप्रवासीलाई अमेरिकी सेनामा भर्ना गर्ने माभ्नी कार्यक्रम नै बन्द गरेको थियो ।
परिणाम स्वरुप अमेरिकी सेनामा सुचीकृत भएर पृष्ठभूमी परिक्षण कुरिरहेका १ हजार भन्दा धेरै आप्रवासीहरुले गत जुनमा कानुनी हैसियत नै गुमाउँदा देशनिकालाको जोखिमको सामना गर्नुपरेको थियो । अमेरिकी सेनामा सुचीकृत भइसकेकाहरुले २ बर्षभित्र सुरक्षा पृष्ठभूमी परिक्षणको परिणाम प्राप्त गर्न नसक्दा कानुनी आप्रवासी हैसियत गुमाएर देशनिकालाको जोखिम भोग्नु परेको हो ।
अमेरिकी सेनामा सुचीकृत भइसकेका कतिपयलाई उनीहरुको देशमा फर्कन समेत जोखिम रहेको छ । अमेरिकी सेनामा सुचीकृत भएका तर पृष्ठभूमी परिक्षणको परिणाम प्राप्त गर्न नसकेका एकजना इराकी युवाले क्यानडामा शरण लिएका थिए । उनी इराक फर्केको खण्डमा आतंकबादी संगठनबाट समातिन सक्ने खतरा रहेको थियो । रुस र चीन जस्ता देशका नागरिकका लागि समेत उनीहरु स्वदेश फर्केपछि अमेरिकी सेनामा सुचीकृत भएको पत्ता लागेमा जेल पर्नसक्ने समेत खतरा रहेको छ ।
क्यालिफोर्नियाकी डेमोक्रेटिक सिनेटर कमला ह्यारिस र इलिनोयका रिचार्ड डर्बिनले विधयेकमा नयाँ प्रावधान घुसाएका थिए । जसका कारण अब कर्मचारीतन्त्रको ढिलाइको शिकार कुर्दा कुर्दै कानुनी हैसियत गुमाएर देशनिकालाको सामना गर्नुपर्ने अवस्थामा कमी आउने विश्वास गरिएको छ ।
अमेरिकामा १० हजार ४ सय भन्दा धेरै आप्रवासीहरु माभ्नी कार्यक्रममार्फत सेनामा प्रवेश गरेका छन् । जसमा कैयन नेपालीहरुसमेत छन् । यो कार्यक्रमले सेनामा भर्ती हुने विभिन्न भाषा र मेडिकल क्षेत्रमा योग्यहरुलाई बिना ग्रिनकार्ड सिधै अमेरिकी नागरिकता प्रदान गर्दछ । विभिन्न गैर आप्रवासी भिसामा रहेका, एसाइलम पाएका वा टेम्पोरेरी प्रोटेक्टेड स्टेटसमा रहेकाहरुले समेत यो सुविधा प्राप्त गर्न सक्ने प्रावधान छ । तर कतिपयको कानुनी स्टेटस पृष्ठभूमी परिक्षणको परिणाम कुर्दा कुर्दै नै समाप्त हुँदा देशनिकालाको सामना गर्नुपरेको हो । त्यसैले पृष्ठभूमी परिक्षणको परिणाम प्राप्त गर्न दुईबर्षको प्रतिक्षा अवधि निकै छोटो भएकाले यसलाई बढाइएको हो ।
गत सेप्टेम्बरमा २ बर्षभित्र पनि पृष्ठभूमी परिक्षणको परिणाम प्राप्त गर्न नसकेकाहरुको सम्झौता रद्द गरिएको थियो । तर पछि कैयनको सम्झौता पुन कायम गरिएको थियो । दुईबर्ष कुर्दा पनि सुरक्षा पृष्ठभूमी परिक्षणको परिणाम प्राप्त गर्न नसकी सम्झौता रद्द गरिसकिएकाहरुले भने थप एक बर्षको अवधि नपाउने जनाइएको छ । यो थप एकबर्षको सुविधा केबल सम्झौता रद्द नभइसकेकाहरुको हकमामात्र लागु हुनेछ ।
