विनाशकारी बाढीका कारण न्युयोर्कमा हुने नेपाली अमेरिकन लगानी सम्मेलन नोभेम्बरसम्म स्थगित
प्रकाशित मिति : १९ भदौ २०८३, शुक्रबार
ग्रेटर न्युयोर्क नेपाली चेम्बर अफ कमर्सका अध्यक्ष प्रदीप श्रेष्ठले अगस्टको मध्यतिर आयोजित कार्यक्रममा लगानी सम्मेलनका कार्यक्रमबारे जानकारी दिँदै।
नेपालमा आएको विनाशकारी बाढी तथा अन्य प्राकृतिक विपद्का कारण नेपाली अमेरिकी व्यापार तथा लगानी शिखर सम्मेलन नोभेम्बर २० देखि २२ सम्मका लागि सारिएको आयोजकले जनाएको छ। अगस्त २६ को विनाशकारी बाढीका कारण सेप्टेम्बर ४ सम्म नेपालमा १,३०० भन्दा बढी शव फेला परिसकेका छन् भने ५,००० भन्दा बढी मानिस अझै बेपत्ता छन्।
ग्रेटर न्युयोर्क नेपाली चेम्बर अफ कमर्स ले सेप्टेम्बर ३ मा सम्मेलनको नयाँ मिति घोषणा गरेको हो। यसअघि तीनदिने सम्मेलन सेप्टेम्बर २५ देखि २७ सम्म आयोजना गर्ने तय गरिएको थियो। सम्मेलन अब पनि म्यारियट न्युयोर्क जेएफके विमानस्थलमै आयोजना हुनेछ।
चेम्बरका पदाधिकारीहरूले नेपाली महावाणिज्य दूतावास तथा अन्य प्रमुख सरोकारवालासँग परामर्श गरेपछि सम्मेलन सार्ने निर्णय गरिएको बताएका छन्। नेपालमा विपद्पछि उद्धार तथा राहतमा केन्द्रित हुनुपर्ने अवस्थामा अमेरिकामा रहेका नेपाली समुदायको ध्यान पनि अहिले नेपालतर्फ केन्द्रित भएको उनीहरूको भनाइ छ।
चेम्बरका अध्यक्ष प्रदीप श्रेष्ठले जारी गरेको विज्ञप्तिमा भनेका छन्, “अहिले हाम्रो समुदायको ध्यान स्वाभाविक रूपमा नेपाल र यस विपद्बाट प्रभावित मानिसहरूमाथि केन्द्रित छ। नाबिसलाई नोभेम्बरसम्म सार्दा हामीले अहिलेको परिस्थितिमा आवश्यक प्रतिक्रिया जनाउन समय पाउनेछौं र यसअघि सुरु गरेको कामलाई निरन्तरता दिँदै अझ बढी केन्द्रित र उद्देश्यपूर्ण ढंगले सबैलाई एकै ठाउँमा ल्याउन सक्नेछौं।”
सम्मेलनमा उद्यमी, लगानीकर्ता, व्यवसायी, नीति निर्माता, वित्तीय संस्था, विभिन्न क्षेत्रका पेशाकर्मी, सरकारी प्रतिनिधि, स्टार्टअप सञ्चालक तथा नेपाली डायस्पोराका सदस्यहरूको सहभागिता रहनेछ।
आयोजकका अनुसार सम्मेलनका लागि यसअघि तय गरिएका कार्यक्रमहरू नयाँ मितिअनुसार पनि सञ्चालन हुनेछन्। यसमा स्टार्टअप प्रदर्शनी, लगानीसम्बन्धी छलफल, नेटवर्किङ कार्यक्रम तथा व्यवसायिक संलग्नताका विभिन्न कार्यक्रम समावेश छन्। परिमार्जित कार्यक्रम तालिका र वक्ताहरूको विवरण आगामी केही सातामा सार्वजनिक गरिने आयोजकले जनाएको छ।
यसअघि दर्ता गरिसकेका सहभागीहरूको दर्ता नोभेम्बरका लागि पनि मान्य हुनेछ र उनीहरूले पुनः दर्ता गर्नुपर्ने छैन। नयाँ मितिमा सहभागी हुन नसक्नेहरूले सम्मेलन आयोजक टोलीलाई [email protected] मा इमेल गरी रकम फिर्ताको अनुरोध गर्न सक्नेछन्।
सेप्टेम्बरमा सम्मेलन हुने अपेक्षामा यात्रा तथा अन्य कार्यक्रमको योजना बनाइसकेका सहभागी, वक्ता, साझेदार, प्रायोजक तथा अतिथिहरूलाई पर्न गएको असुविधाप्रति चेम्बरले क्षमा मागेको छ।