वाल स्ट्रिट जर्नलविरुद्ध ट्रम्पको १० अर्ब डलरको मुद्दा अमेरिकी न्यायाधीशद्वारा खारेज
प्रकाशित मिति : १४ कार्तिक २०८३, शनिबार
अमेरिकी राष्ट्रपति ट्रम्प । तस्वीर : एपी/रासस
अमेरिकी न्यायाधीश डारिन गेल्सले राष्ट्रपति डोनाल्ड ट्रम्पले द वाल स्ट्रिट जर्नल विरुद्ध दायर गरेको १० अर्ब अमेरिकी डलरको मानहानि मुद्दा खारेज गरिदिएका छन्। न्यायाधीशले उक्त मुद्दाको कुनै आधार नरहेको र यो “हावामा हात हालेसरह” भएको टिप्पणी गरेका छन्।
ट्रम्पले गत वर्ष द वाल स्ट्रिट जर्नलको माउ कम्पनी ‘डाउ जोन्स’ र यसका प्रमुख रूपर्ट मर्डोकविरुद्ध मुद्दा दायर गरेका थिए। उक्त समाचार संस्थाले सन् २००३ मा यौन अपराधमा सजाय पाएका बदनाम फाइनान्सर जेफ्री एप्स्टिनको ५०औँ जन्मोत्सवको अवसरमा तयार पारिएको एक विशेष पुस्तकमा ट्रम्पले पठाएको भनिएको पत्रको बारेमा समाचार प्रकाशित गरेको थियो। एप्स्टिनमाथि यौन अपराधको आरोप लाग्नुभन्दा पहिलेको उक्त पत्रमा ट्रम्पको नाम, आपत्तिजनक/सुझावात्मक भाषा र एक महिलाको शरीरको रेखाचित्र कोरिएको दाबी गरिएको थियो।
ट्रम्पले उक्त पत्र लेखेको वा हस्ताक्षर गरेको कुरालाई अस्वीकार गर्दै आएका छन्। तर, न्यायाधीश डारिन गेल्सले प्रेस स्वतन्त्रताको रक्षा गर्ने अमेरिकी संविधानको पहिलो संशोधनको मर्मविपरीत ट्रम्पको दाबी रहेको ठहर गर्दै केस खारेज गरिदिएका हुन्।
न्यायाधीश गेल्सले यसअघि पनि ट्रम्पले २० अर्ब डलर क्षतिपूर्ति माग गर्दै दायर गरेको मुद्दा खारेज गरेका थिए। पछि ट्रम्पको कानुनी टोलीले दाबी रकम घटाएर १० अर्ब डलर बनाउँदै पुनः मुद्दा दायर गरेको थियो। यस पटक भने न्यायाधीशले मुद्दालाई पूर्वाग्रहसहित खारेज गरिदिएका छन्, जसको अर्थ ट्रम्पले अब यही विषयमा पुनः मुद्दा दायर गर्न पाउने छैनन्।
समाचार संस्थाले गहन र विस्तृत अनुसन्धानका आधारमा समाचार प्रकाशित गरेको उल्लेख गर्दै न्यायाधीशले ट्रम्पको कानुनी टोलीले उनीहरूको काममा दोष देखाउन तथ्यहीन प्रयास गरेको बताए।
अमेरिकी कानुनअनुसार सार्वजनिक व्यक्तिले मानहानिको मुद्दा जित्नका लागि विपक्षीले बद्नियतपूर्ण तरिकाले काम गरेको प्रमाणित गर्नुपर्छ। अर्थात्, मिडियालाई उक्त कुरा झुटो हो भन्ने थाहा हुँदाहुँदै वा सत्यताको वास्ता नगरी समाचार छापेको पुष्टि हुनुपर्छ। ट्रम्पको टोलीले मिडियालाई पत्र नकली भएको जानकारी गराउँदा पनि समाचार छापेको तर्क गरेको थियो।
तर, न्यायाधीश गेल्सले लेखेका छन्, कुनै सार्वजनिक व्यक्ति वा उसको टोलीले आरोप अस्वीकार गर्नेबित्तिकै पत्रकारलाई समाचार छाप्नबाट रोक्ने हो भने यसले निर्किक र स्वतन्त्र रूपमा विचार व्यक्त गर्ने अमेरिकी अधिकारको धज्जी उडाउनेछ।
वाल स्ट्रिट जर्नलका अनुसार ट्रम्पको नाम उल्लेखित उक्त पत्रमा टाइप गरिएका केही पंक्तिहरूका साथै मोटो मार्करले कोरिएको नाङ्गी महिलाको रेखाचित्र थियो। पत्रमा रहस्यहरू कहिल्यै पुराना हुँदैनन् भन्ने ठट्टाका साथै साथी हुनु अद्भुत कुरा हो। जन्मदिनको शुभकामना – र हरेक दिन अर्को अद्भुत रहस्य बनोस् भन्ने शब्दहरू लेखिएका थिए।