इरानसँगको द्वन्द्व चुलिएपछि मध्यपूर्वमा रहेका नागरिकलाई देश छाड्न अमेरिकाको आग्रह
फाइल फोटो : एएफपी/रासस
इरानसँगको द्वन्द्व तीव्र रूपमा बढेपछि अमेरिकी विदेश मन्त्रालयले मध्यपूर्व क्षेत्रमा रहेका आफ्ना नागरिकहरूलाई सतर्क रहन र अल्पकालीन सूचनामै उक्त क्षेत्र छाड्न तयार रहन आग्रह गरेको छ। उडान रद्द हुन सक्ने र सुरक्षा जोखिम बढ्न सक्ने चेतावनी दिँदै विदेश मन्त्रालयले शनिबार यस्तो अपिल जारी गरेको हो।
अमेरिकी राष्ट्रपति डोनल्ड ट्रम्पले इरानमाथि अझै कडा आक्रमण गर्ने चेतावनी दिँदै शुक्रबार “उनीहरूमाथि निकै भारी प्रहार गरिनेछ” भनेका छन्। अर्कोतर्फ, इरानले पनि अमेरिकालाई “सजाय दिने” कसम खाएको छ। दुवै देशले एकअर्कामाथि ठूलो मात्रामा हवाई र क्षेप्यास्त्र प्रहार गरिसकेका छन्।
“हाल मध्यपूर्वमा रहेका अमेरिकी नागरिकहरूले उच्च सतर्कता अपनाउनुपर्छ। उडान रद्द हुने, समय-समयमा हवाई क्षेत्र बन्द हुने तथा यात्रामा व्यवधान आउन सक्ने भएकाले जुनसुकै बेला देश छाड्न तयार हुनुपर्छ,” अमेरिकी विदेश मन्त्रालयले भनेको छ, यस क्षेत्रका केही एयरलाइन्सले उडान तालिका स्थगित गरेका छन् भने केहीले आफ्ना मार्गहरू नै रद्द गरेका छन्। परिस्थिति थप बिग्रन सक्ने भएकाले त्यहाँ रहेका अमेरिकीहरूले मध्यपूर्व छाड्ने विषयमा विचार गर्नुपर्छ।
संयुक्त अरब इमिरेट्स (युएई), बहराइन, इराक, इजरायल, जोर्डन, कुवेत, लेबनान, ओमान, कतार र साउदी अरेबियास्थित अमेरिकी दूतावासहरूमार्फत यो चेतावनी जारी गरिएको हो। विदेश मन्त्रालयले यसअघि पनि यस्तै किसिमको वक्तव्य जारी गरेको थियो, तर त्यसमा नागरिकहरूलाई मध्यपूर्व छाड्न वा यात्रा पुनर्विचार गर्न आग्रह गरिएको थिएन। यसले द्वन्द्व अझै फैलन सक्ने वासिङ्टनको बढ्दो चिन्तालाई स्पष्ट पार्छ।
यसैबीच, कुवेती सेनाले आफ्नो वायु रक्षा प्रणालीले इरानबाट भएका ड्रोन आक्रमणहरूलाई बीचमै विफल पारिदिएको जनाएको छ।
अमेरिकी सेनाले दुई दिनअघि इरानमाथि “भारी आक्रमणको लहर” चलाएको पुष्टि गरेको छ। राष्ट्रपति ट्रम्प युद्धको वर्तमान स्थितिबाट चरम असन्तुष्ट बनेको उनीनिकट स्रोतहरूले जनाएका छन्। ट्रम्पले यो युद्ध छिटै सकिने दाबी गरे पनि द्वन्द्व छैटौँ महिनामा प्रवेश गरिसकेको छ।
यस लामो द्वन्द्वका कारण विश्वभर इन्धनको मूल्य वृद्धि भएको छ भने अमेरिकामा पनि ग्यासोलिनको भाउ बढेको छ। गत जुन महिनामा अमेरिका र इरानबीच युद्धविरामका लागि समझदारी पत्रमा हस्ताक्षर हुँदा केही समयका लागि द्वन्द्व रोकिएको थियो। तर जुलाईको सुरुमा ट्रम्पले युद्धविराम समाप्त भएको घोषणा गरेपछि दुवै देशले पुनः एकअर्काका सैन्य तथा रणनीतिक ठेगानाहरूमा प्रहार सुरु गरेका हुन्।