घडीको सुई बदल्ने परम्परा अन्त्य गर्दै अमेरिका, तल्लो सदनद्वारा नयाँ विधेयक स्वीकृत
प्रकाशित मिति : ३० असार २०८३, मंगलबार
Photo: Hunters Race/ Unsplash
अमेरिकामा वर्षैभरि स्थायी रूपमा ‘डेलाइट सेभिङ टाइम’ लागू गर्ने सम्बन्धी एक द्विपक्षीय विधेयक प्रतिनिधि सभाबाट भारी बहुमतले पारित भएको छ। मङ्गलवार भएको मतदानमा सांसदहरूले ३०८–११७ मतको अन्तरले ‘सनशाइन प्रोटेक्सन एक्ट’लाई स्वीकृत गरेका हुन्। यस विधेयकले राज्यहरूलाई वर्षैभरि साँझको समयमा उज्यालो लम्ब्याउन स्वेच्छिक रूपमा डेलाइट सेभिङ टाइम कायम राख्ने अनुमति दिनेछ।
विधेयकको समर्थन गर्दै फ्लोरिडाकी रिपब्लिकन सांसद क्याट क्यामाकले भनिन्, “दशकौंदेखि हामीले मार्चमा घडीको सुई अगाडि सार्ने र नोभेम्बरमा पछाडि सार्ने यो परम्परालाई स्विकार्दै आएका छौँ। यसले मानिसहरूको दैनिक तालिका बिगार्नुका साथै निन्द्रामा बाधा पुऱ्याउँछ र परिवारहरूमा अनावश्यक तनाव सिर्जना गर्छ। अब अमेरिकीहरूलाई वर्षमा दुई पटक घडी बदल्न लगाउने काम बन्द गरौँ।
यो विधेयकले दुवै दलका सांसदहरूलाई भौगोलिक आधारमा विभाजित गरेको छ। लुजियाना, फ्लोरिडा र न्यु जर्सी जस्ता तटीय क्षेत्रका सांसदहरूले स्थायी डेलाइट सेभिङ टाइमको समर्थन गरेका छन् भने मध्य-पश्चिम र कृषिप्रधान राज्यका सांसदहरूले यसको विरोध गरेका छन्।
डेमोक्र्याट पार्टीका सांसदहरू यस विषयमा लगभग समान रूपमा विभाजित थिए, जहाँ हाउस माइनोरिटी लिडर हाकिम जेफ्रिजले यसको विपक्षमा मतदान गरे। रिपब्लिकनतर्फ भने ब्रायन स्टाइल, रिक क्रफोर्ड, रायन जिन्के र ह्यारियट हेजम्यान लगायत केवल २२ जना सांसदले मात्र विपक्षमा मत हालेका थिए।
यो विधेयक अब माथिल्लो सदनमा पठाइनेछ, जहाँ दुवै दलका सदस्यहरूको आशंकाका कारण यसको भविष्य अझै अनिश्चित छ। यद्यपि, दुई पटक घडी परिवर्तन गर्ने प्रथाको लामो समयदेखि विरोध गर्दै आएका राष्ट्रपति डोनाल्ड ट्रम्पले यो विधेयक आफ्नो डेस्कमा पुगेमा हस्ताक्षर गर्ने अपेक्षा गरिएको छ। ह्वाइट हाउसले पनि यसलाई एक लोकप्रिय र व्यावहारिक सुधार भन्दै सांसदहरूलाई समर्थन गर्न आग्रह गरेको छ।
विधेयकका लेखक रिपब्लिकन सांसद भर्न बुकानन र अन्य समर्थकहरूका अनुसार घडी परिवर्तन गर्दा बालबालिकाको दिनचर्या र सडक सुरक्षामा पर्न जाने असर यस विधेयकले अन्त्य गर्नेछ। साथै, साँझमा लामो समयसम्म उज्यालो रहँदा पर्यटन र बाह्य मनोरञ्जन क्षेत्रलाई फाइदा पुग्ने उनीहरूको तर्क छ। फ्लोरिडाकी सांसद मारिया एल्विरा सालाजारले सामाजिक सञ्जालमा लेखेकी छिन्, साँझमा बढी समय घाम लाग्नुको अर्थ परिवारसँग धेरै समय बिताउन पाउनु र स्थानीय पसल तथा रेस्टुरेन्टहरूको आनन्द लिनु हो।
अर्कोतर्फ, विरोधीहरूले स्थायी रूपमा डेलाइट सेभिङ टाइम लागू गर्दा जाडो महिनामा देशका कतिपय भागमा बिहान ९ बजेसम्म पनि सूर्योदय नहुने दाबी गरेका छन्। यसले गर्दा बालबालिकाहरू अँध्यारोमा विद्यालय जानुपर्ने र किसानहरूले ढिलो काम सुरु गर्नुपर्ने हुँदा सुरक्षा र आर्थिक चुनौती थपिने उनीहरूको भनाइ छ।
स्वास्थ्य विशेषज्ञ र निन्द्रा सम्बन्धी डाक्टरहरूले पनि स्थायी ‘स्ट्यान्डर्ड टाइम’ जसले बिहान बढी उज्यालो दिन्छ-मानव शरीरको प्राकृतिक जैविक घडीका लागि उपयुक्त हुने बताएका छन्। विज्ञानलाई प्राथमिकता दिनुपर्ने माग गर्दै डेमोक्र्याट सांसद मेरी गे स्क्यानलोनले सन् १९७४ मा अमेरिकाले गरेको यस्तै असफल प्रयोगको स्मरण गराइन्, जसलाई जनआक्रोशका कारण कांग्रेसले फिर्ता लिनुपरेको थियो।
हाल अमेरिकाका हवाई र एरिजोनाका अधिकांश क्षेत्रबाहेक प्रायः सबै राज्यमा मार्चमा घडी एक घण्टा अगाडि सार्ने र नोभेम्बरमा एक घण्टा पछाडि सार्ने चलन छ। हालै गरिएको एक सर्वेक्षण अनुसार केवल १२% अमेरिकी मात्र वर्तमान प्रणालीको पक्षमा छन् भने बहुमत जनता यसको परिवर्तनको पक्षमा देखिएका छन्।