अस्ट्रेलियामाथि २-० को जित निकाल्दै अमेरिका विश्वकपको नकआउट चरणमा प्रवेश
विश्वकप फुटबल अन्तर्गत समूह ‘डी’ को खेलमा अस्ट्रेलियाका ज्याकब इटालियानो (बायाँ) को प्रहारलाई रोक्ने प्रयास गर्दै अमेरिकाका वेस्टन म्याकेनी। तस्बिर: एपी फोटो/लिन्डसे वासन/रासस
सन् २०२६ को फिफा विश्वकप फुटबल अन्तर्गत समूह ‘डी’ को रोमान्चक खेलमा अस्ट्रेलियालाई २-० ले पराजित गर्दै सह-आयोजक अमेरिका नकआउट चरणमा प्रवेश गरेको छ । पहिलो खेलमा पाराग्वेलाई ४-१ ले हराएको अमेरिकाले लगातार दोस्रो जित दर्ता गर्दै एक खेल अगावै अर्को चरणको यात्रा तय गरेको हो ।
अमेरिकी फुटबल इतिहासमा विश्वकपको सुरुवाती दुवै खेल जितेको यो ९६ वर्षयताकै पहिलो पटक हो । यसअघि सन् १९३० मा आयोजित पहिलो विश्वकपमा मात्र अमेरिकाले यस्तो सफलता पाएको थियो । यस ऐतिहासिक जितले घरेलु दर्शकहरू माझ ठूलो उत्साह थपेको छ ।
खेलको ११औँ मिनेटमा फालोरिन बालोगुनको खतरनाक क्रस पासलाई रोक्ने क्रममा अस्ट्रेलियाका डिफेन्डर क्यामरुन बर्गसले आत्मघाती गोल गरेपछि अमेरिकाले सुरुवाती अग्रता लिएको थियो । विश्वकपको इतिहासमा आफ्नो सुरुवाती दुवै खेलमा विपक्षीको आत्मघाती गोलबाट खाता खोल्ने अमेरिका पहिलो टोली बनेको छ ।
पहिलो हाफ सकिनु दुई मिनेट अगाडि (४३औँ मिनेटमा) २१ वर्षीय युवा डिफेन्डर एलेक्स फ्रीम्यानले हेडमार्फत गोल गर्दै अमेरिकाको जित सुनिश्चित गरे । सर्जिनो डेस्टको प्रहार डिफ्लेक्ट भएर आएपछि फ्रीम्यानले त्यसलाई पोस्टको दिशा दिएका थिए । उनी अमेरिकी विश्वकप इतिहासकै तेस्रो कान्छा गोलकर्ता समेत बनेका छन् ।
चोटका कारण मुख्य विङ्गर तथा कप्तान क्रिस्टियन पुलिसिक मैदान बाहिर रहे पनि रिकार्डो पेपी र बालोगुन सम्मिलित अमेरिकी आक्रमण पंक्तिले खेलमा बलियो प्रभाव जमायो । दोस्रो हाफमा अस्ट्रेलियाले केही कडा चुनौती र दबाब सिर्जना गरे पनि अमेरिकी रक्षापंक्तिले विपक्षीलाई गोल गर्न दिएन। अब अमेरिकाले समूह चरणको अन्तिम खेल बिहीबार टर्की विरुद्ध लस एन्जलसमा खेल्नेछ ।