‘अपरेशन टेक ब्याक अमेरिका’ तीव्र : आपराधिक सञ्जालमाथि प्रहार, एक सातामै २३९ मुद्दा दर्ता
फोटो : टिन्गी इन्जुरी ल फर्म
अमेरिकाको साउथ टेक्सासस्थित संघीय सरकारी वकिलको कार्यालयले सीमा सुरक्षा तथा अध्यागमन सम्बन्धी मुद्दामा व्यापक कानुनी कारबाही अघि बढाएको छ। कार्यबाहक अमेरिकी महान्यायाधिवक्ता जोन जी. ई. मार्कका अनुसार अप्रिल २४ देखि ३० सम्मको अवधिमा मात्रै साउथ टेक्सासमा कुल २३९ नयाँ मुद्दा दर्ता गरिएको छ।
दर्ता भएका मुद्दामध्ये १६३ जनामाथि गैरकानुनी रूपमा अमेरिका प्रवेश गरेको आरोप लगाइएको छ भने ५३ जनालाई देशनिकाला पछि पुनः प्रवेश गरेको गम्भीर अभियोग लगाइएको छ। साथै, २८ जनामाथि मानव तस्करीसम्बन्धी मुद्दा दायर गरिएको छ, जसले सीमा क्षेत्रमा बढ्दो आपराधिक गतिविधिको संकेत दिएको छ।
अधिकांश अभियुक्तहरूको आपराधिक पृष्ठभूमि रहेको खुलासा भएको छ। अभियोगपत्रअनुसार कतिपय व्यक्तिहरू यसअघि लागूऔषध कारोबार, हिंसात्मक गतिविधि तथा गम्भीर यौन अपराधमा संलग्न भई सजाय भुक्तानपछि देशनिकाला गरिएका थिए। मेक्सिकन नागरिक जोस लुइस एन्गुआना-रुइजलाई बालबालिकामाथि गम्भीर यौन दुर्व्यवहारको आरोपमा निष्कासन गरिएको थियो, तर उनी पुनः अमेरिका प्रवेश गरेको अवस्थामा पक्राउ परेका छन्।
यसैबीच, मानव तस्करी तथा खतरनाक सवारी सञ्चालनसम्बन्धी मुद्दामा अदालतले कडा निर्णयहरू सुनाएको छ। ह्युस्टनमा बसेको जुरीले ३६ वर्षीय मेक्सिकन नागरिक लुइस अल्बर्टो बान्डा अकोस्टालाई गैरकानुनी पुनः प्रवेशको आरोपमा दोषी ठहर गरेको छ। उनले आफूलाई अपहरण गरेर जबरजस्ती सीमा पार गराइएको दाबी गरे पनि अदालतले उक्त दाबी अस्वीकार गरेको छ।
त्यस्तै, लरेडोका २१ वर्षीय एरिक राफेल सालासलाई आप्रवासी तस्करी र उच्च गतिमा सवारी चलाउने (हाई-स्पिड चेज) मा संलग्न रहेको अभियोगमा दोषी ठहर गरिएको छ।
मानव तस्करीकै अर्को गम्भीर घटनामा ‘चुय’ नामले चिनिने जिसस ग्रिमाल्डोलाई १२१ महिनाको जेल सजाय सुनाइएको छ। उनको नेतृत्वमा गरिएको तस्करीका क्रममा अत्यधिक गर्मीका कारण एक आप्रवासीको ज्यान गएको थियो।
यी सबै कारबाहीहरू ‘अपरेशन टेक ब्याक अमेरिका’अन्तर्गत सञ्चालन भइरहेका छन्। उक्त अभियानको मुख्य उद्देश्य गैरकानुनी अध्यागमन नियन्त्रण गर्नुका साथै आपराधिक सञ्जालहरूलाई ध्वस्त पार्दै स्थानीय समुदायलाई सुरक्षित बनाउनु रहेको अधिकारीहरूले जनाएका छन्।