३ मंसिर २०८३, बिहिबार| Thursday, November 19, 2026
अन्तर्राष्ट्रिय

इरानमाथि अमेरिका-इजरायलको आक्रमणपछि संयुक्त राष्ट्र सुरक्षा परिषद्ले बोलायो आकस्मिक बैठक

संयुक्त राष्ट्रसंघका महासचिव एन्टोनियो गुटेरेस । तस्वीर : एपी

अमेरिका र इजरायलले इरानमाथि सैन्य आक्रमण गरेपछि मध्यपूर्वमा उत्पन्न नयाँ तनावका विषयमा संयुक्त राष्ट्र सुरक्षा परिषद्को शनिबार आकस्मिक बैठक बस्ने भएको छ।

संयुक्त राष्ट्रका कूटनीतिज्ञहरूका अनुसार १५ सदस्यीय परिषद्को बैठक न्यूयोर्कमा स्थानीय समयअनुसार दिउँसो ४ बजे (२१०० जीएमटी) बस्नेछ। यस महिनाको परिषद् अध्यक्षता गरिरहेको बेलायतले बैठकको अध्यक्षता गर्नेछ।

रुसको संयुक्त राष्ट्र मिसनले अमेरिका र इजरायलद्वारा इस्लामिक गणतन्त्र इरानविरुद्ध गरिएको “उक्साहटविहीन सशस्त्र आक्रमण” का सम्बन्धमा रूस र चीनले आकस्मिक बैठकको माग गरेको जनाएको छ। उक्त बैठकको आह्वानमा फ्रान्स, बहराइन र कोलम्बियाले पनि समर्थन गरेका छन्।

रूसी वक्तव्यमा भनिएको छ, “सुरक्षा परिषद्को बैठकमा हामी अमेरिका र इजरायलसँग उनीहरूको अवैध तथा तनाव बढाउने गतिविधि तत्काल रोक्न र राजनीतिक तथा कूटनीतिक समाधानतर्फ अघि बढ्न माग गर्नेछौं।”

यसैबीच, संयुक्त राष्ट्रका महासचिव एन्टोनियो गुटेरेसले पनि बैठकमा सम्बोधन गर्ने योजना बनाएका छन्। उनले शनिबार नै एक विज्ञप्ति जारी गर्दै मध्यपूर्वमा बढ्दो सैन्य तनावको कडा शब्दमा निन्दा गरेका थिए।

गुटेरेसले अमेरिका र इजरायलद्वारा इरानविरुद्ध गरिएको बल प्रयोग तथा त्यसपछि इरानले क्षेत्रभरि गरेको प्रतिकारात्मक कारबाहीले अन्तर्राष्ट्रिय शान्ति र सुरक्षालाई कमजोर बनाएको उल्लेख गरेका छन्। उनले तत्काल शत्रुता अन्त्य र तनाव न्यूनीकरणका लागि सबै पक्षलाई वार्ताको टेबुलमा फर्कन आग्रह गरेका छन्।

मध्यपूर्व क्षेत्रमा बढ्दो तनावले व्यापक क्षेत्रीय द्वन्द्वको जोखिम बढाएको भन्दै अन्तर्राष्ट्रिय समुदायले संयमता अपनाउन आह्वान गरिरहेको छ।

खसोखासका समाचार नछुटाउनुहोस्Follow Khasokhas for immigration, green card, tax and community news.Facebook मा Follow गर्नुहोस् →