ग्रिनकार्ड पाउनेगरी अमेरिका आउने नेपालीको आप्रवासी भिसामा अस्थायी रोक भोलिदेखि
प्रकाशित मिति : माघ ६, २०८२ मंगलबार
अमेरिकी विदेश मन्त्रालयले जनवरी २१ देखि लागू हुने गरी ग्रिनकार्ड पाउनेगरी अमेरिका आउने नेपालीको आप्रवासी भिसामा अस्थायी रोक लगाएको छ । अमेरिकी विदेश मन्त्रालयले ७५ वटा देशका नागरिकहरूका लागि आप्रवासी भिसा प्रक्रियामा अस्थायी रोक लगाएको हो ।
यो कदम आप्रवासीहरू अमेरिका आएपछि सरकारी सुविधामा निर्भर हुन सक्ने सम्भावनालाई रोक्न र सम्बन्धित कानुनहरूको कार्यान्वयनमा कडाइ गर्न चालिएको हो । अमेरिकी विदेश मन्त्रालयका प्रवक्ताले खसोखासलाई प्रतिकृया दिदै यसको पुष्टी गरेका
विदेश मन्त्रालयले आफ्नो स्क्रिनिङ र जाँचका मापदण्डहरू पुनरावलोकन नगरेसम्म कन्सुलर अधिकारीहरूलाई विद्यमान कानुनी अधिकार प्रयोग गर्दै भिसा अस्वीकार गर्न निर्देशन दिइएको छ। यो स्थगन अनिश्चितकालका लागि रहनेछ र पुनरावलोकन सकिएपछि मात्र हटाइने जनाइएको छ ।
यस निर्णयबाट प्रभावित हुने देशहरूको सूचीमा नेपाल, सोमालिया, रुस, अफगानिस्तान, ब्राजिल, इरान, इराक, इजिप्ट, नाइजेरिया, थाइल्याण्ड, र यमन लगायत अन्य दर्जनौं राष्ट्रहरू रहेका छन्। विशेष गरी सोमालियाको सन्दर्भमा मिनेसोटामा करदाताको पैसाबाट सञ्चालित सहायता कार्यक्रमहरूको व्यापक दुरुपयोग भएको खुलासा भएपछि यो कडाइ गरिएको हो।
यो नीति नोभेम्बर २०२५ मा जारी गरिएको मार्गदर्शनमा आधारित छ, जसले अमेरिकी अध्यागमन कानुनको पब्लिक चार्ज प्रावधानलाई थप प्रभावकारी रूपमा लागू गर्न जोड दिएको छ। यस प्रावधान अन्तर्गत यदि कुनै आवेदक भविष्यमा अमेरिकामा सरकारी सुविधामा निर्भर हुने देखिन्छ भने अधिकारीहरूले निजको भिसा अस्वीकार गर्न सक्छन्।
यसैबीच अमेरिकी विदेश मन्त्रालयले सरकारी सुविधा प्रयोग गर्ने जोखिम भएका नेपाली लगायतको अमेरिकाको आप्रवासी भिसा स्थगनबारे ४ महत्वपूर्ण प्रश्नको जवाफ दिएको छ ।
आप्रवासी भिसा अन्तर्वार्ता अप्वाइन्टमेन्टका बारेमा जवाफ दिदै विदेश मन्त्रालयले प्रभावित देशका नागरिक रहेका आप्रवासी भिसा आवेदकहरूले भिसा आवेदन बुझाउन र अन्तर्वार्तामा उपस्थित हुन सक्ने प्रष्ट पारेको छ । अमेरिकी विदेश मन्त्रालयले आवेदकहरूको अन्तर्वार्ता तय गर्ने कार्य जारी राख्ने तर रोक अवधिभर यी देशका नागरिकहरूलाई कुनै पनि आप्रवासी भिसा जारी नगरिने विदेश मन्त्रालयको भनाई छ ।
त्यस्तै यसमा केही अपवादहरू पनि रहेको विदेश मन्त्रालयले जनाएको छ । ७५ देशमा नपर्ने देशको वैध राहदानी प्रयोग गरी आवेदन दिने दोहोरो नागरिकता भएका व्यक्तिहरूलाई यो रोक लागू नहुने विदेश मन्त्रालयले प्रष्ट पारेको छ । हालको वैध भिसालाई असर पार्ने नपार्नेबारे प्रष्ट पार्दै विदेश मन्त्रालयले भनेको छ, “यस निर्देशनको भागको रूपमा कुनै पनि आप्रवासी भिसाहरू रद्द गरिएका छैनन्। अमेरिकामा प्रवेश सम्बन्धी प्रश्नहरूको लागि हामी तपाईंलाई होमल्याण्ड सेक्युरिटीमा सम्पर्क गर्न सुझाव दिन्छौं।”
यो स्थगन पर्यटक भिसामा लागू हुने नहुनेबारे पनि धेरैका जिज्ञासा रहेका छन् । यसबारे अमेरिकी विदेश मन्त्रालयले भनेको छ, “यो रोक विशेष गरी आप्रवासी भिसा आवेदकहरूका लागि मात्र हो। पर्यटक भिसा गैर आप्रवासी भिसा हो।”
राष्ट्रपति ट्रम्पले आप्रवासीहरू आर्थिक रूपमा आत्मनिर्भर हुनुपर्ने र अमेरिकीहरूका लागि आर्थिक बोझ बन्न नहुने कुरा स्पष्ट पारेको र यी उच्च जोखिम भएका देशहरूका आप्रवासीहरूले अमेरिकामा कल्याणकारी सुविधाहरू प्रयोग नगर्ने वा पब्लिक चार्ज नबन्ने कुरा सुनिश्चित गर्न सबै नीति, नियम र निर्देशनहरूको पूर्ण समीक्षा गरिरहेको विदेश मन्त्रालयले जनाएको छ ।