भोलिदेखि युएससीआईएसबाट चेक र मनी अर्डरमार्फत पेमेन्ट लिन बन्द
प्रकाशित मिति : कार्तिक ११, २०८२ मंगलबार
यूएससीआईएसले कागजी रूपमा फाइल गरिएका आवेदनहरूका लागि आज अक्टोबर २८ पछि अनिवार्य रूपमा इलेक्ट्रोनिक भुक्तानी मात्र स्वीकार गर्न सुरु गरेको छ। यूएससीआईएसले अगस्टमा नै यसको घोषणा गरेर अक्टोबर २८ सम्मको सहुलियत अवधि दिएको थियो। तर अब भुक्तानीका रूपमा चेक वा मनी अर्डर पठाइएको खण्डमा यूएससीआईएसले अस्वीकार गर्ने भएको छ।
शुल्क भुक्तानी क्रेडिट कार्ड वा डेबिट कार्ड प्रयोग गरेर फारम जी–१४५० मार्फत वा अमेरिकाको बैंक खाताबाट एसीएच कारोबार मार्फत फारम जी–१६५० प्रयोग गरी गर्न सकिन्छ। एसीएच डेबिट विकल्प फारम जी–१४५० प्रयोग गरी क्रेडिट कार्डबाट भुक्तानी गर्ने पहिलेकै विकल्पमा थपिएको हो।
यूएससीआईएसका प्रवक्ता म्याथ्यू ट्रेगेसरका अनुसार यस कदमले आवेदकहरूलाई फिल्ड अफिसहरूमा नगद वा चेक पठाउनुपर्ने आवश्यकतालाई हटाएर शुल्क भुक्तानीलाई आधुनिकीकरण गर्छ। संघीय सरकारसँगको र सरकारबाट हुने वित्तीय कारोबारहरूलाई आधुनिक बनाउनु ट्रम्प प्रशासनको प्राथमिकता रहेको ट्रेगेसरको भनाइ छ।
९० प्रतिशतभन्दा बढी भुक्तानीहरू चेक र मनी अर्डरबाट आउँदा प्रशोधनमा ढिलाइ र ठगी वा भुक्तानी हराउने जोखिम बढाउने भएकाले नयाँ कदम स्पष्ट आवश्यक कदम भएको यूएससीआईएसको भनाइ छ। यो अभ्यास आधुनिक भुक्तानीहरू अमेरिकाको बैंक खातामा गर्नुपर्ने कार्यकारी आदेश १४२४७ अनुसार रहेको छ।
यूएससीआईएस अनलाइन फाइल गरिएका फारमहरूको लागि अनलाइन भुक्तानी स्वीकार गर्न जारी राखेको छ। यूएससीआईएसले उपलब्ध भएसम्म आवेदकलाई आफ्ना आवेदनहरू अनलाइनमार्फत फाइल गर्न प्रोत्साहन गर्दै आएको छ। अनलाइन फाइल गर्नेहरूले सरकारको पेमेन्ट प्लेटफर्म प्रयोग गरी सुरक्षित रूपमा आफ्नो शुल्क तिर्न सक्छन्।
आवेदकहरूले आफ्नो खातामा पर्याप्त रकम छ भनी सुनिश्चित गर्नुपर्छ। कारोबार अस्वीकृत भएमा यूएससीआईएसले कुनै पनि आवेदन अस्वीकार गर्न सक्छ। यदि तपाईंसँग अमेरिकाको बैंक खाता छैन भने तपाईंले फारम जी–१६५० प्रयोग गर्न सक्नुहुन्न, तर तपाईं फारम जी–१४५० बुझाएर प्रिपेड क्रेडिट कार्डहरू प्रयोग गरी शुल्क तिर्न सक्नुहुन्छ।