अमेरिकाले गैर नागरिकहरूलाई ट्रयाक गर्न सीमानामा फेसियल रिकग्निसनको विस्तार गर्दै
प्रकाशित मिति : कार्तिक १०, २०८२ सोमबार
ह्युस्टन अन्तर्राष्ट्रिय विमानस्थलमा उडान अघि बायोमेट्रिक प्रदान गर्दै एक यात्रु । फोटो: डोना बर्टन
अमेरिकाले भिसाको म्याद सकिएर बस्ने र पासपोर्टमा हुने जालसाजीलाई नियन्त्रण गर्नका लागि देश प्रवेश गर्ने र छोड्ने गैर-नागरिकहरूलाई ट्रयाक गर्न फेसियल रिकग्निसन प्रविधिको प्रयोग विस्तार गर्ने भएको छ। यो जानकारी सोमबार फेडरल रजिष्ट्ररमा प्रकाशित अन्तिम नियममा उल्लेख गरिएको छ ।
नयाँ नियमनले अमेरिकी सीमा अधिकारीहरूलाई गैर नागरिकहरूलाई विमानस्थल, समुद्री बन्दरगाह, जमिन पार गर्ने नाकाहरू र बाहिरिने अन्य कुनै पनि स्थानमा फोटो खिच्न लगाउन सक्नेछ, जुन पहिलेको परीक्षण कार्यक्रमको विस्तार हो। डिसेम्बर २६ देखि लागू हुने यो नियमन अन्तर्गत, अमेरिकी अधिकारीहरूले औंठाछाप वा डीएनए जस्ता अन्य बायोमेट्रिक्स पनि बुझाउन लगाउन सक्नेछन्।
यसले सीमा अधिकारीहरूलाई १४ वर्ष मुनिका बालबालिका र ७९ वर्ष माथिका वृद्धवृद्धाको लागि पनि फेसियल रिकग्निसन प्रयोग गर्न अनुमति दिन्छ, जुन समूहहरूलाई हालसम्म छुट दिइएको थियो।
यो कडा सीमा नियमहरू अमेरिकी राष्ट्रपति डोनाल्ड ट्रम्प द्वारा अवैध आप्रवासनमाथि कडाई गर्ने व्यापक प्रयासको हिस्सा हो। राष्ट्रपति ट्रम्पले अमेरिका मेक्सिको सीमा सुरक्षित गर्नका लागि स्रोतहरू बढाउनुका साथै भिसाको म्याद सकिएर बस्ने मानिसहरूको सङ्ख्या घटाउन पनि कदम चालेका छन्।
अमेरिकी विमानस्थलहरूमा फेसियल रिकग्निसनको बढ्दो प्रयोगले निगरानी र गल्तीहरूको चिन्ता व्यक्त गर्ने वाचडग समूहहरूले गोपनीयताको चिन्ता गरेका छन् । यूएस कमिशन अन सिभिल राइट्सको २०२४ को एक रिपोर्टले परीक्षणहरूमा फेसियल रिकग्निसनले अश्वेत मानिसहरू र अन्य अल्पसंख्यक समूहहरूलाई गलत पहिचान गर्ने सम्भावना बढी देखाएको उल्लेख छ।
कङ्ग्रेसनल रिसर्च सर्भिसले २०२३ मा गरेको अनुमान अनुशार अमेरिकामा अवैध रूपमा बसोबास गरिरहेका १ करोड १० लाख आप्रवासीहरू मध्ये करिब ४२ प्रतिशतले भिसाको म्याद सकिएपछि पनि देशमै बसिरहेका थिए। यसलाई पूर्ण रूपमा कार्यान्वयन गर्नका लागि सन् १९९६ मा अमेरिकी कङ्ग्रेसले एक स्वचालित प्रवेश निकास प्रणाली बनाउने कानून पारित गरेको थियो, तर यो कहिल्यै पूर्ण रूपमा लागू भएको छैन।
यूएस कस्टम्स एन्ड बोर्डर प्रोटेक्शनले पहिले नै सबै व्यावसायिक हवाई प्रवेशहरूका लागि फेसियल रिकग्निसन प्रयोग गरिरहेको छ तर अमेरिकाबाहिर जानेहरुको रेकर्ड गर्नका लागि निश्चित स्थानहरूमा मात्र प्रयोग गरिरहेको छ ।
बायोमेट्रिक प्रवेश निकास प्रणालीलाई आगामी तीन देखि पाँच वर्षभित्र सबै व्यावसायिक विमानस्थल र समुद्री बन्दरगाहहरूमा प्रवेश र निकास दुवैका लागि पूर्ण रूपमा लागू गर्न सकिने सीबीपीले जनाएको छ ।