विनाभिसा अमेरिका प्रवेश गरेका आप्रवासी किशोरकिशोरीलाई ५,००० डलर जरिवाना पठाइदै
प्रकाशित मिति : कार्तिक ९, २०८२ आईतबार
(डिएचएस फोटो: सिड्नी फिनिक्स)
डिपार्टमेन्ट अफ होमल्यान्ड सेक्युरिटीले विनाभिसा अमेरिका प्रवेश गरेका आप्रवासी किशोरकिशोरीलाई ५ हजार डलर जरिवानाको पत्र पठाइरहेको छ । न्युयोर्कमा १४ देखि १७ वर्षका कैयन किशोरकिशोरीले अक्टोबरको मध्यतिर जरिवानापत्र प्राप्त गरेका छन्। न्युयोर्कबाहेक मिशिगन लगायतका राज्यमा पनि आप्रवासीहरुले जरिवानाका पत्रहरु पाएका छन्।
यो जरिवाना राष्ट्रपति डोनाल्ड ट्रम्पले जुलाईमा हस्ताक्षर गरेको कानूनद्वारा सिर्जना गरिएका आप्रवासीहरूका लागि नयाँ आर्थिक दण्डहरूमध्ये एक हो। संघीय सरकारले यो जरिवाना कानूनको अस्वीकार्य विदेशी पक्राउ शुल्क शीर्षक अन्तर्गत लगाइरहेको छ, जसलाई ५ हजार डलर तोकिएको छ । यो पोर्ट अफ इन्ट्रीहरूबीच पक्राउ पर्ने व्यक्तिहरूमा लागू गर्न सकिन्छ। होमल्यान्ड सेक्युरिटीले यो जरिवाना नाबालिगहरूमा पनि लगाएको विषय यसअघि जानकारीमा आएको थिएन ।
जरिवाना पाउने किशोरकिशोरीहरू संघीय शरणार्थी पुनर्वास कार्यालयद्वारा सञ्चालित आश्रयस्थलहरूमा बसिरहेकाहरु समेत रहेका छन् । शरणार्थी पुनर्वास कार्यालय प्रायोजक वयस्कलाई जिम्मा लगाउनु अघिसम्म अभिभावक विनाका आप्रवासी बालबालिकालाई हिरासत लिने गर्दछ। वास्तवमा डर पैदा गर्न खोजिएको र आश्रयस्थलमा रहेका बच्चाले यो जरिवाना तिर्न सक्ने कुनै उपाय नहुने तथा यसका दण्डहरु कडा रहेको आप्रवासी अधिकारकर्मीहरुको भनाई छ ।
५ हजार डलर जरिवानाका सूचनाहरूमा भुक्तानी पूरै अहिले नै गर्न भनिएको छ । भुक्तानी गर्न असफल भएमा सङ्कलन मुद्दा चलाउने र उनीहरूको आप्रवासी मुद्दाहरूमा नकारात्मक असर पर्ने जस्ता विभिन्न सम्भावित परिणामहरूको सूची दिइएको छ। पूर्ण रूपमा भुक्तानी नगरिएका जरिवानाहरूमा ब्याज लाग्ने समेत जनाइएको छ ।
टेक्सस र पेन्सिलभेनियाका नाबालिगहरूले पनि यो जरिवाना पाएको जनाइएको छ । यो जरिवाना ट्रम्प प्रशासनको एक्लै अमेरिका प्रवेश गरेका नाबालिगहरूलाई उनीहरूको गृह देश फर्कन दबाब दिने थुप्रै प्रयासहरूमध्ये एक हो। हालै सरकारले संघीय शरणार्थी पुनर्वास कार्यालयको हिरासतमा रहेका दर्जनौं अभिभावक विनाका ग्वाटेमालाका बालबालिकालाई देश निकाला गर्ने प्रयास गरेको थियो । एक न्यायाधीशले योजना रोक्नुअघि नै बालबालिकाहरूलाई विमानमा चढाइसकिएको थियो। अक्टोबरको सुरुमा सरकारले देश छोड्न सहमत हुने १४ वर्ष वा सोभन्दा माथिका अभिभावक विनाका नाबालिगहरूलाई २५ सय डलर दिने प्रस्ताव गरेको थियो।
नयाँ कानूनले सिर्जना गरेका अन्य शुल्कहरूमा शरणका लागि आवेदन दिन १ सय डलर शुल्कका साथै आवेदन विचाराधीन रहेको प्रत्येक वर्ष १०० डलर लगायत छन् । शरणार्थीहरूका लागि वर्क परमिटको आवेदन दिन ५५० डलर र देश निकालाको आदेश दिइएका तर अमेरिका नछाडेको आवस्थामा आइसद्वारा पक्राउ परेका जो कोहीलाई ५ हजार डलर समावेश छन्।