न्यु जर्सीमा ‘नोर इस्टर’ आँधीको खतराले संकटकाल घोषणा
नर्थ क्यारोलिनामा आँधी आउँदै गर्दा समुन्द्रमा उभिएको घरको अवशेष देखिन्छ (एपी फोटो/एलिसन जोइस)
‘नोर इस्टर’ आँधी आइतबार पूर्वी तट तिर बढ्दै गर्दा सडकहरू भत्किएका छन् भने हवाई उडानहरूमा ढिलाइ भएको छ। यो आँधीले अत्यधिक वर्षा, तीब्र हावाहुरी र तटीय क्षेत्रमा बाढी ल्याउने सम्भावना भएकाले अमेरिकाको उत्तरपूर्वी क्षेत्रका घना बस्ती भएका इलाकाहरू सतर्क बनेका छन्। यसको सबैभन्दा ठूलो प्रभाव तटीय क्षेत्रमा बाढीको सम्भावना हुनेछ, विशेष गरी उत्तरपूर्वी नर्थ क्यारोलाइनादेखि न्यु जर्सीको धेरैजसो तटसम्मका क्षेत्रहरूमा त्यस्तो जोखिम रहेको छ ।
दक्षिणपूर्वी न्यु इङ्गल्याण्ड, न्यु योर्क सिटी क्षेत्रमा पनि भारी वर्षाको पूर्वानुमान गरिएको छ। न्यु जर्सी राज्यभरि शनिबार रातिदेखि नै संकटकालको घोषणा गरिएको छ र यो सोमबारसम्म जारी रहने अपेक्षा गरिएको छ। यसले राज्यका आपतकालीन सेवा कर्मचारीहरूलाई आवश्यक अनुसार परिचालन गर्ने अधिकार दिएको छ। लङ आइल्यान्डमा पनि उच्च समुद्री छालका कारण खाडी र जलमार्गहरूमा पानी पस्ने सम्भावनालाई ध्यानमा राख्दै नासा काउन्टीका प्रमुख ब्रुस ब्ल्याकम्यानले आइतबार संकटकाल घोषणा गरेका छन्।
राज्यका केही भागहरूमा मध्यमदेखि ठूलो तटीय बाढी, भित्री भागमा आकस्मिक बाढी, प्रति घण्टा ९७ किलोमिटर सम्मको हावा, करिब १३ सेन्टिमिटर सम्मको वर्षा र उच्च छालहरूको पूर्वानुमान गरिएको छ, जसले समुद्र तटको कटान गराउन सक्छ। केही स्वयंसेवकहरूले समुद्र तटहरूमा बालुवाका बोराहरू राखेका छन्।
नेशनल वेदर सर्भिसले न्यु योर्क सिटी, लङ आइल्यान्ड र दक्षिणी वेस्टचेस्टर काउन्टीमा कम्तीमा सोमबार दिउँसोसम्मको लागि तटीय बाढीको चेतावनी र हावाहुरीको सल्लाह जारी गरेको छ। मौसम सेवाका अनुसार लङ आइल्यान्डको तटीय उपनगरीय क्षेत्रहरूमा ८ सेन्टिमिटर सम्मको वर्षा र उच्च हावाहुरीसहित बाढी आउन सक्छ।
आइतबार बिहानैदेखि यस क्षेत्रमा प्रति घण्टा ४८ किलोमिटर भन्दा बढीको हावाको झोका रेकर्ड गरिएको छ। आँधीको सामना गर्न यस क्षेत्रका युटिलिटी कम्पनीहरूले १६०० भन्दा बढी कामदारहरू थपेका छन्। न्यु योर्ककी गभर्नर क्याथी होकुलले उच्च हावाहुरीको चेतावनी र बाढीको जोखिमका साथ सबैको सुरक्षाको लागि सतर्क र सजग रहनु र तयारीका लागि कदम चाल्नु महत्त्वपूर्ण भएको बताएकी छिन् ।
वासिङ्टन डीसीदेखि बोस्टन सम्मका विमानस्थलहरूमा केही उडानहरू ढिलाइ र रद्द गरिएको घोषणा गरिएको छ। यो आँधी सोमबार रातिसम्ममा हट्ने अपेक्षा गरिएको छ। यसैगरी अलास्काका केही भागहरूमा पनि टाइफुन हालोङका अवशेषहरू राज्यको पश्चिमी तटतिर बढिरहेकोले उच्च हावाहुरीको चेतावनी जारी गरिएको छ। यद्यपि, आँधी पहिलेको अनुमानभन्दा पूर्वतिर सरेकाले उच्च जलस्तरको जोखिम कम भएको मौसम सेवाले जनाएको छ।
