अमेरिकामा ओभरस्टे हुने नेपाली विद्यार्थीहरूको संख्यामा पुनः वृद्धि, १० प्रतिशतभन्दा धेरै ओभरस्टे
प्रकाशित मिति : आश्विन १०, २०८२ शनिबार
एआईको प्रयोगबाट बनाइएको तस्वीर ।
अमेरिकी सरकारको डिपार्टमेन्ट अफ होमल्याण्ड सेक्युरिटीको तथ्यांक अनुसार आर्थिक वर्ष २०२४ मा अमेरिकामा ५०६ जना नेपाली विद्यार्थीहरू ओभरस्टे भएका छन्। एफ, एम र जे भिसामा आएका नेपाली विद्यार्थीहरूमध्ये ४ हजार ९ सय ३७ जनाले २०२४ मा अमेरिका छाड्नुपर्ने थियो। त्यसमध्ये, ४४ जनाले ओभरस्टे भइसकेपछि अमेरिका छाडेका छन् भने ४६२ जना ओभरस्टे भईसक्दा पनि अमेरिकामा नै बसिरहेका छन्। यसरी अमेरिकामा ओभरस्टे हुने नेपाली विद्यार्थीहरूको दर १०.२५ प्रतिशत रहेको छ, जुन प्रतिशत र संख्या दुवै हिसाबले अघिल्लो आर्थिक वर्षको तुलनामा बढी हो।
आर्थिक वर्ष २०२३ मा भने ४,३९१ नेपाली विद्यार्थीहरू अमेरिका छोड्नुपर्ने सूचीमा थिए। तीमध्ये २३ जनाले ओभरस्टे भइसकेपछि अमेरिका छाडे भने ४२५ जना ओभरस्टे भईसक्दा पनि अमेरिकामा नै बसे। नेपाली विद्यार्थीको कुल ओभरस्टे दर २०२३ मा १०.२० प्रतिशत देखिएको थियो।
यद्यपि, २०२३ को तथ्यांक आर्थिक वर्ष २०२२ को तुलनामा सुधारिएको थियो। किनभने २०२२ मा ४,०८३ नेपाली विद्यार्थीहरूलाई अमेरिका छोड्नुपर्ने सूचीमा राखिएको थियो। तीमध्ये ३७ जनाले ओभरस्टे भएपछि अमेरिका छाडे भने ६४३ जना ओभरस्टे भईसक्दा पनि अमेरिकाभित्रै बसे। त्यस वर्ष नेपाली विद्यार्थीहरूको कुल ओभरस्टे दर १६.६५ प्रतिशत थियो।
सीबीपीको व्याख्या अनुसार अमेरिकामा कानुनतः प्रवेश गरेका तर आफ्नो स्वीकृत बसोबास अवधिभन्दा लामो समय बसेकाहरू ओभरस्टे भएका मानिन्छन्। यो अवधि निश्चित समयावधि वा कुनै विशेष क्रियाकलाप जस्तै पूर्ण अध्ययन कोर्ष वा कुनै प्राविधिक वा व्यावहारिक तालिम कार्यक्रमको अवधिसम्मको हुन सक्छ।
डिपार्टमेन्ट अफ होमल्याण्ड सेक्युरिटीले थप व्याख्या गर्दै भनेको छ: “विदेशी नागरिकले आफ्नो आगमनको उद्देश्य पूरा गरेपछि वा त्यो उद्देश्यको लागि समर्पित गतिविधिमा संलग्न नरहेपछि स्वीकृत बसोबास अवधि समाप्त हुन्छ। उदाहरणका लागि, अध्ययनका लागि अमेरिका प्रवेश गरेका विद्यार्थीले आफ्नो कार्यक्रम समाप्त गरेपछि अमेरिका छोड्नुपर्छ, अर्को आप्रवासन स्थिति परिवर्तन गर्नुपर्छ, वा अर्को अध्ययन कार्यक्रममा अगाडि बढ्नुपर्छ।”
सेभिजको पछिल्लो तथ्यांक अनुसार अमेरिकामा विद्यार्थी भिसामा अध्ययनरत नेपाली विद्यार्थीहरूको संख्या ३४ हजार ८ सय ७ रहेको छ। अगस्टको सुरुमा अमेरिकाका विभिन्न शिक्षण संस्थामा सक्रिय विद्यार्थीहरूको संख्या ३० हजार १९ रहेकोमा सेप्टेम्बरमा यो संख्यामा उल्लेख्य वृद्धि भएको हो। जुलाईमा यो संख्या ३० हजार ८ सय ४० रहेकोमा अगस्टमा अचानक घटेको थियो।
सेप्टेम्बरमा अमेरिकामा सक्रिय नेपाली विद्यार्थीहरू ३४ हजार ८ सय ७ मध्ये १९ हजार ५ सय ८० जना पुरुष रहेका छन् भने १५ हजार २ सय २५ जना महिला रहेका छन्। शैक्षिक तह अनुसार, ६ हजार ८ सय ३६ जना एसोसिएट, १२ हजार ६ सय ८२ जना ब्याचलर्स, ४ हजार ३ सय ३६ जना डाक्टरेट र ६४ जना फ्लाइट स्कुल मा अध्ययन गरिरहेका छन्। त्यस्तै, ३२३ जना भाषा तालिम कक्षा मा अध्ययन गरिरहेका छन् भने १० हजार ३ सय ३१ जनाले मास्टर्स गरिरहेका छन्। २२६ जना अन्य कक्षाहरूमा सहभागी छन् भने ९ जना सेकेण्डरी स्तरमा विद्यार्थी भिसामा अध्ययनरत छन्।