न्यूयोर्क राज्यले सेप्टेम्बरको अन्त्यदेखि राहत चेकहरू पठाउन सुरु गर्ने, कस्ले कति पाउनेछन् ?
प्रकाशित मिति : भाद्र १६, २०८२ मंगलबार
Photo by Blogging Guide
न्यूयोर्क राज्यले २०२५ को सेप्टेम्बरको अन्त्यदेखि ८० लाखभन्दा बढी बासिन्दाहरूलाई एकमुष्ट मुद्रास्फीति राहत चेकहरू पठाउने तयारी गरेको छ। यी चेकहरू २०२५/२०२६ को राज्य बजेटको हिस्सा हुन्, जसले मुद्रास्फीतिका कारण बढेको बिक्री करबाट प्रभावित बासिन्दाहरूलाई राहत प्रदान गर्दछ। योग्य न्यूयोर्करहरूले यसका लागि आवेदन दिनु पर्दैन । चेकहरू योग्य व्यक्तिहरूलाई स्वतः पठाइनेछ।
राहत चेकका लागि योग्य हुन तपाईं २०२३ मा न्यूयोर्कको बर्षभरको पूर्ण बासिन्दा हुनुपर्छ र त्यस वर्षको लागि न्यूयोर्क राज्य निवासी आयकर फाइल गरेको हुनुपर्छ। तपाईंले निर्दिष्ट आय आवश्यकताहरू पनि पूरा गरेको हुनुपर्छ र अरू कुनै करदाताको आश्रितको रूपमा दाबी गरिएको हुनु हुँदैन। राहत रकम तपाईंको २०२३ को आय र फाइलिङ स्थितिको आधारमा फरक हुन्छ।
७५ हजार डलर वा सोभन्दा कमको न्यूयोर्क समायोजित सकल आयभएका एकल फाइलरहरूलाई २ सय डलर चेकका लागि योग्य हुनेछन् भने ७५ हजार र १५० लाख ५० हजार बीचको आय भएकाहरू १५० डलरका लागि योग्य हुनेछन् । संयुक्त रूपमा फाइल गर्ने विवाहित जोडीहरूका सन्दर्भमा आय १ लाख ५० हजार वा सोभन्दा कम भएमा ४०० डलर प्राप्त गर्नेछन् । १लाख ५० हजारदेखि ३ लाखको बीचको आय भएका जोडीले ३ सय डलर पाउनेछन् ।
चेकहरू धेरै हप्ताको अवधिमा पठाइनेछ भने वितरण जिप कोड वा क्षेत्रमा आधारित हुनेछैन। यसको मतलब तपाईंको छिमेकीले तपाईं भन्दा चाँडो वा ढिलो चेक प्राप्त गर्न सक्छन्। राज्यले कुनै खास वितरण तालिका प्रदान गरेको छैन । चेकहरू तपाईंको सबैभन्दा हालको फाइल गरिएको कर रिटर्नमा रहेको ठेगानामा पठाइनेछ। यदि तपाईं सरेर जानुभएको छ र आफ्नो ठेगाना अद्यावधिक गर्न आवश्यक हुनेछ । तपाईंले आफ्नो अनलाइन एकाउन्ट मार्फत ठेगाना परिवर्तन गर्न सक्नुहुन्छ।
यी चेकहरु भौतिक चेकको रूपमा जारी गरिनेछन् । तपाईंको अघिल्लो आयकर रिटर्नहरु सिधा बैंक खातामा जम्मा भए पनि यो चाहिँ स्वचालित रूपमा जम्मा हुनेछैन। यो रकम कुनै पनि तिर्न बाँकी रकममा पनि लागू गरिने छैन। २०२३ को न्यूयोर्क निवासी आयकर रिटर्न फाइल नगर्ने वा केवल आंशिक बासिन्दा रहेका करदाताहरू यस चेकका लागि लागि योग्य छैनन्।