जेनेभालाई फ्रान्सेली राष्ट्रपतिको सुझाव : पुटिन-जेलेन्स्की शिखर सम्मेलन आयोजना गर्नू
प्रकाशित मिति : भाद्र २, २०८२ मंगलबार
फ्रान्सका राष्ट्रपति इम्मानुएल म्याक्रोनले जेनेभाले रुसी राष्ट्रपति भ्लादिमिर पुटिन र युक्रेनी राष्ट्रपति भोलोडिमिर जेलेन्स्कीबीचको शान्ति शिखर सम्मेलन आयोजना गर्न सुझाव दिएका छन् ।
सोमबार ह्वाइट हाउसमा युक्रेनी राष्ट्रपतिसँग भएको उच्चस्तरीय बैठकपछि म्याक्रोनले जेलेन्स्की–पुटिन शिखर सम्मेलन युरोपमै हुने जानकारी दिए ।
फ्रान्सेली समाचार च्यानल ‘एलसीआई’ मा मङ्गलबार प्रसारित अन्तर्वार्तामा म्याक्रोनले भने, “यो कुनै तटस्थ देशद्वारा आयोजना हुनेछ, सायद स्विट्जरल्याण्ड । म जेनेभाका लागि दबाब दिइरहेको छु वा अर्को देश ।”
“पछिल्लो पटक द्विपक्षीय वार्ता इस्तानबुलमा भएका थिए”, उनले मे र जुलाईमा टर्कीमा रुस र युक्रेनबीच भएको तीन चरणको तल्लोस्तरीय वार्तालाई स्मरण गर्दै भने ।
म्याक्रोनका अनुसार फ्रान्स र बेलायतले मङ्गलबार अन्य युक्रेनी सहयोगीहरूसँग वासिङ्टनमा बैठक गर्नेछन् । बैठकको उद्देश्य युक्रेनका लागि सुरक्षा ग्यारेन्टीबारे अद्यावधिक रहनु हो । यो विषय ट्रम्पसँगको भेटघाटको मुख्य एजेन्डा हो ।
“त्यसपछि हामी अमेरिकीहरूसँग ठोस काम सुरु गर्नेछौँ । भोलिसम्म हाम्रा कूटनीतिक सल्लाहकारहरू, मन्त्रीहरू र कर्मचारी प्रमुखहरूले के गर्न तयार छन् भनेर काम सुरु गर्नेछन्”, म्याक्रोनले भने ।
जेलेन्स्कीले रुसलाई क्षेत्र छोड्न बाध्य पार्नेबारे उठेको प्रश्नमा म्याक्रोनले भने, “यो युक्रेनमा निर्भर छ । युक्रेनले आफूले उचित र सही ठानेका सम्झौता गर्नेछ ।”
तर, उनले भने, “हामी कानूनी मान्यताको विषयमा धेरै सावधान हुनुपर्छ । यदि देशहरूले ‘हामी बलपूर्वक क्षेत्र लिन सक्छौँ’ भन्न थाल्छन् भने त्यसले प्यान्डोराको बक्स खोलिदिन्छ ।”