एमाले छाडेको खनालको घोषणा, देश र समाजको हितमा सधैँ काम गर्ने प्रतिबद्धता
प्रकाशित मिति : पुस २०, २०८१ शनिबार
नेपाल प्रहरीका पूर्व प्रमुख सर्वेन्द्र खनालले नेकपा (एमाले) छाडेको घोषणा गर्नुभएको छ ।
आइतबार सामाजिक सञ्जालमार्फत खनालले आफू कुनै राजनीतिक पार्टीसँग आबद्ध नभएको बताउनुभएको हो । उहाँले फेसबुकमा लेख्नुभएको छ, “हजुरहरू मेरो राजनीतिक स्थितिबारे अन्योलमा परेको महसुस गरेर म यसै माध्यम बाट यसलाई स्पष्ट पार्न चाहन्छु कि म अहिले कुनै पनि राजनैतिक पार्टीसँग आबद्ध छैन ।
पूर्व प्रहरी प्रमुख खनालले आफूले स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको उल्लेख गर्नुभएको छ । उहाँले देश र समाजको हितका लागि आफ्नो समय परिस्थिति अनुकूल सधैँ सक्दो कार्यहरू गरिरहने समेत जिकिर गर्नुभएको छ ।
उहाँले लेख्नुभएको छ, “म स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको छु । म देश र समाज हितका लागि आफ्नो समय परिस्थिति अनुकूल सधैँ सक्दो कार्यहरू गरिरहने छु ।”
नेपाल प्रहरीका २६ औँ प्रहरी महानिरीक्षक खनालले २०७६ फागुन १ गते अनिवार्य अवकाश लिनुभएको थियो । उहाँ पछि, २०७९ असोज ६ गते नेकपा (एमाले)मा प्रवेश गर्नुभएको थियो ।