पत्रकार मरासिनीसहित ९ जनालाई ‘जेसीज उत्कृष्ट युवा पुरस्कार’
प्रकाशित मिति : पुस ७, २०८१ आईतबार
पत्रकार एवं लेखक गोविन्द मरासिनीसहित ९ जना युवा जुनियर च्याम्बर इन्टरनेसनल नेपाल (जेसीज) ‘उत्कृष्ट युवा पुरस्कार-२०२४’ बाट पुरस्कृत भएका छन् ।
मरासिनीलाई पत्रकारितामार्फत राष्ट्रिय र अन्तर्राष्ट्रिय क्षेत्रमा पुर्याएको योगदान स्वरूप ‘देशको प्रतिष्ठा बढाउन अन्तर्राष्ट्रिय क्षेत्रमा गरेको प्रयास’ विधामा मरासिनीलाई उक्त पुरस्कारबाट पुरस्कृत गरिएको हो । करिब डेढ दशकदेखि पत्रकारितामा क्रियाशील मरासिनीले मूलतः युवा, पर्यटन, सामाजिक, कला र समसामयिक विषयमा विभिन्न राष्ट्रिय स्तरका पत्रिकाहरू र विभिन्न जर्नलमा अनुसन्धानात्मक लेख लेख्दै आएका छन् ।
मरासिनीसँगै क्रिकेट खेलाडी द्वय करण केसी र रुविना क्षेत्री, साहित्यतर्फ कुमार सिंह, सामाजिक न्यायको क्षेत्रमा क्रियाशील कविता नेपाल, कलाकारितातर्फ पूर्णबहादुरको सारङ्गीका चर्चित कलाकार विजय बराल, आर्थिक क्षेत्रमा प्रगति गर्ने राहिव साहीवाला, विज्ञान प्रविधितर्फ कपिली खनाल र सङ्गीततर्फ सरोज श्रेष्ठ पुरस्कृत भए ।
जेसीजले हरेक वर्ष राष्ट्रलाई उत्कृष्ट योगदान पुर्याउने १० युवालाई उत्कृष्ट युवा पुरस्कारबाट पुरस्कृत गर्दै आएको छ ।
उनीहरूलाई जेसीजको ५१ औँ राष्ट्रिय महाधिवेशनको उद्घाटन समारोहमा प्रधानमन्त्री केपी शर्मा ओली, कोसी प्रदेशका मुख्यमन्त्री हिक्मतकुमार कार्की लगायतले प्रमाणपत्र, नगद पुरस्कार र मेडल सहित पुरस्कृत गरेका हुन् ।