श्रीमतीको उपचार गराउन आउँदा श्रीमानको पनि ज्यान गयो
प्रकाशित मिति : मंसिर २८, २०८१ शुक्रबार
रुपन्देहीको बुटवलमा भएको दुर्घटनामा ३ जनाको मृत्यु भएको छ । मृत्यु हुनेमा दम्पतीसमेत रहेको प्रहरीले जनाएको छ ।
पूर्वपश्चिम राजमार्ग अन्तर्गत तिनाउ पुलमा नजिक भएको दुर्घटनामा बुटवल–१२ नयाँगाउँ बस्ने ७१ वर्षीय तिलकराम खनाल, उहाँकी श्रीमती ६७ वर्षीया गौरी खनाल र जिप चालक ३२ वर्षीय हरि न्यौपानेको मृत्यु भएको इलाका प्रहरी कार्यालय बुटवलका प्रहरी नायव उपरीक्षक विजयराज पण्डितले बताउनु भयो ।
बुटवलमा रहेको लुम्बिनी प्रादेशिक अस्पतालमा गौरी खनाललाई दमको उपचारका लागि नयाँ गाउँबाट ल्याउने क्रममा जिप पुलको डिभाइडरमा ठोक्किएर पल्टिएको हो ।
अर्घाखाँची क्याटरिङको लु २ च २४८० नम्बरको बलेरो जिप तिनाउ पुल कटिसकेपछिको मोडमा दुर्घटनामा परेको प्रहरीले बताएको छ ।
