पाँच रुसी नागरिकको धौलागिरि आरोहणको क्रममा मृत्यु
प्रकाशित मिति : आश्विन २२, २०८१ मंगलबार
धौलागिरि हिमाल आरोहणमा गएका ५ जना रुसी पर्वतारोहीको मृत्यु भएको छ ।
हाईक्याप आधार शिविरबाट आइतबारदेखि सम्पर्कविहीन भएका उनीहको शव भेटिएको हो ।
जिल्ला प्रहरी कार्यालयका प्रहरी नायब उपरीक्षक भरत श्रेष्ठका अनुसार अलेक्जेन्डर दुशेको, ओलेग कुर्गलोभ, भ्लालिमिर चिस्तिकोभ, मिखाइल नोसेन्को र डिमित्री शालिलेभोइको शव भेटिएको हो ।
आइतबार बिहान ११ बजेदेखि सम्पर्कविहीन भएका उनीहरुको हेलिकप्टरबाट खोजी गरिएको थियो ।
आईएएम ट्रेकिङ कम्पनीको व्यवस्थापनमा गएका ती आरोही सुरुमा दुई समूह बनाएर आरोहण गर्न चाहन्थे । तर, १४ मध्ये ६ जनाको स्वास्थ्य बिग्रिएपछि उनीहरुले आरोहणको योजना रद्द गरेर आधार शिविरमै बसे ।
मंगलबार हेलिकोप्टर पुग्दा भने उनीहरू समुन्द्री सतहबाट ७६०० मिटरको उचाइमा लडिरहेको भेटेको र सबैको मृत्यु भइसकेको पाइएको बताइएको छ । क्याम्प १ बाट झरेका पर्वतारोहीलाई भने उद्धार गरी काठमाडौँ ल्याएर उपचारमा पठाइसकेको विभागले जनाएको छ ।
मौसम प्रतिकुल हुनु र समयमा गरेको अनुरोध पालना नगरेर आरोहण सम्पन्न गरेरै छाड्ने अडानले उनीहरू दुर्घटनामा परेको देखिएको छ ।