आईपीएल क्रिकेटमा प्लेअफको समिकरण पुरा , आरसीबी संग साविक बिजेता चेन्नईको हार
प्रकाशित मिति : जेष्ठ ५, २०८१ शनिबार
आईपीएल क्रिकेटमा रोयल च्यालेन्जर्स बेंगलूरु आरसीबी प्लेअफमा पुगेको छ । शनिबारराति भएको लिग चरणको आफ्नो अन्तिम खेलमा आरसीबीले साविकको उपाधि विजेता टोली चेन्नई सुपर किंग्सलाई २७ रनले हराउँदै प्लेअफको यात्रा तय गरेको हो ।
प्लेअफमा पुग्न कम्तीमा १८ रनको जित आरसीबीलाई आवश्यक थियो । आरसीबीले दिएको २ सय १९ रनको लक्ष्य पछ्याएको चेन्नईले निर्धारित २० ओभरमा ७ विकेट गुमाएर १ सय ९१ रन मात्र बनाउन सक्यो ।
चेन्नईका रचिन रवीन्द्रले सर्वाधिक ६१ रन बनाए पनि टिमको हार टार्न सकेनन । उनले ३७ बलमा ५ चौका र ३ छक्का प्रहार गरे । आरसीबीका यश दयालले दुई विकेट लिए ।
यसअघि पहिले ब्याटिङ गरेको बैंगलुरुले कप्तान फाफ डु प्लेसिसको अर्धशतकको मद्दतले निर्धारित २० ओभरमा ५ विकेटको क्षतिमा २ सय १८ रन बनाएको थियो ।आरसीबीका कप्तान फाप्प डु प्लेसिसले सर्वाधिक ५४ रन बनाए ।
डुप्लेसिसले ३९ बलमा ५४ रन बनाउने क्रममा ३ चौका र ३ छक्का प्रहार गरे । विराट कोहलीले २९ बलमा ४७ रन बनाएर टोलीलाई उत्कृष्ट सुरुवात दिलाए । चेन्नईका शार्दुल ठाकुरले दुई विकेट लिए ।
पहिलो ८ खेलमा एक खेल मात्र जितेको आरसीबी त्यसपछिका लगातार ६ खेल जित्दै अङ्क तालिकाको चौथो स्थानमा रहन सफल भएको हो । आईपीएल क्रिकेटमा आइतबार दिउँसो पौने ४ बजे सनराइजर्स हैदरावाद र पञ्जाव किङ्ग्स खेल्दैछन् ।
यस्तै बेलुका पौने आठ बजे राजस्थान रोयल्स र कोलकत्ता नाइट राइडर्सबीच खेल हुनेछ । १६ अङ्क रहेको राजस्थान र १५ अङ्क रहेको सनराईजर्स राउण्ड रोबिन चरणको दोस्रो स्थानमा रहन प्रयासरत छन् । बैंगलुरुसँगै कोलकाता नाइट राइडर्स, राजस्थान रोयल्स र सनराइजर्स हैदराबाद प्लेअफमा पुगिसकेका छन् ।