भजन शिरोमणि भक्तराज आचार्यको निधन
प्रकाशित मिति : १४ फाल्गुन २०८०, सोमबार
वरिष्ठ गायक तथा सङ्गीतकार भक्तराज आचार्यको निधन भएको छ । भजन शिरोमणिसमेत उपाधि पाउनुभएका उहाँको आज अपराह्न ८२ वर्षको उमेरमा निधन भएको हो ।
वरिष्ठ गायक तथा सङ्गीतकार आचार्यलाई उपचारका लागि ललितपुरको मेडिसिटी अस्पताल लैजाने क्रममा बाटोमै निधन भएको सङ्गीतकार चेतन सापकोटाले जानकारी दिनुभयो । अचानक अक्सिजनको मात्रा घटेपछि उहाँलाई अस्पताल लगिँदै थियो ।
आचार्यले मुटु जलिरहेछ, जति चोट दिन्छौँ, जहाँ छन् बुद्धका आँखा, हजार सपनाहरूको, माया मेरी साँझ बिहान, हजार आँखा हेर्नेलगायत करिब चार सय गीतमा आवाज दिनुभएको छ । गायक आचार्यको पार्थिव शरीरलाई मङ्गलबार बिहान ९ बजे सङ्गीत तथा नाट्य प्रज्ञा–प्रतिष्ठानको परिसरमा अन्तिम श्रद्धाञ्जलिका लागि राखिने सङ्गीतकार सापकोटाले बताउनुभयो ।
उहाँको जन्म बुबा बलभद्र र आमा रेनुकाको कोखबाट विसं १९९९ साल असोज १६ मा भएको थियो। उहाँले साढे एक वर्षमै बुबा गुमाउनुभएको थियो । सोहि बेला गाउँमा चलेको महामारीका कारण आमासँगै उहाँ भारतको डुअर्सको चियाबगान पुग्नुभएको थियो जहाँ उहाँले जीवनका ३१ वर्ष बिताउनुभयो । बिस्तारै आमाको अवस्था पनि कमजोर हुँदै गएपछि कम उमेरमै उहाँले पारिवारिक दायित्व सम्हाल्नुपरेको थियो। जस्तोसुकै विपत्तिमा पनि सङ्गीतप्रतिको उनको लगाव जारी नै रह्यो। सङ्गीत प्रभाकरसम्म उहाँले अध्ययन गर्नुभएको थियो ।
तीसको दशकको सुरुवातसँगै उहाँको साङ्गीतिक जीवनले मोड लिएको थियो। २०३० सालमा काठमाडौंमा भएको अधिराज्यव्यापी राष्ट्रिय गीत प्रतियोगितामा उहाँले गाएको होसियार यसबखत समयको मुखलाई चिन प्रथम भएको थियो र उहाँले स्वर्ण पदक पाउनुभएको थियो । यस गीतका संगीतकार तथा रचनाकार अम्बर गुरुङले पनिस्वर्ण पदक प्राप्त गर्नुभएको थियो ।
प्रतियोगितामा प्रथम भएपछि उहाँ रेडियो नेपालमा जागिरे हुनुभयो । त्यसयता विसं २०४६ सालसम्ममा उहाँले साढे चार सय गीत रेकर्ड गरिसक्नुभएको थियो । दुई दर्जनबाहेक सबै गीत उहाँले आफ्नै रचनामा तयार पार्नुभएको थियो । उहाँले धेरैजसो भजन र त्यसबाहेक आधुनिक, गजल, राष्ट्रिय, बालगीत लगायत कोएर, ब्यालेट, कविता गायन र चलचित्रको पाश्र्व गायनसमेत गर्नुभयो । युगल गीत भने चारवटा मात्रै गाउनुभयो ।
विसं २०४६ सालको एक साँझ बौद्धमा साङ्घातिक हमला भएपछि भक्तराजका टाउकामा झन्डै सयभन्दा बढी टाँका मार्नुपरेको थियो। त्यसयता लगभग उहाँको गायनयात्रामा विराम लागेको थियो। गायक आचार्यका दुई छोरा सत्यराज र स्वरूपराज पनि साङ्गीतिक क्षेत्रमै क्रियाशिल हुनुहुन्छ ।