न्युयोर्क सिटीमा नेपालको झण्डा फहराउँदै मेयर आडम्सले भने -‘नेपाली समुदायप्रति गर्व गर्छु’
प्रकाशित मिति : ५ आश्विन २०८०, शुक्रबार
संसारको ब्यापारिक राजधानी न्युयोर्क सिटीको विश्व ब्यापारिक केन्द्रको आगन वाल स्ट्रीटको नजिक बलिङ ग्रिन पार्कमा न्युयोर्क सिटीका मेयर एरिक आडम्सले नेपाली समुदायको सम्मानमा नेपालको झण्डा फहराएका छन् । न्युयोर्क सिटीका नेपाली समुदायले पहिलो पटक न्युयोर्क सिटीमा गर्वका साथ मेयर आडम्सले नेपालको अनुपम झण्डा फहराएको देखेर इतिहास रचेका छन् । कार्यक्रम न्युयोर्क सिटी मेयरको कार्यालय, बलिंग ग्रिन पार्क एसोसिएसन, माइनोरिटी इम्पावरमेन्ट, नेपाली महावाणिज्य दूतावास न्युयोर्क र धेरै नेपाली सामुदायिक संस्थाहरूको संलग्नतामा एकता र सांस्कृतिक गौरव देखाउने सामुहिक प्रयास थियो।
कार्यक्रममा बोल्दै मेयर एरिक आडम्सले नेपाली समुदायले न्युयोर्क सिटी र अमेरिकामा गरेको योगदानका लागि धेरै धेरै धन्यवाद दिए । उनले भने – ‘हामीलाई थाहा छ कि नेपालबाट आएको ठूलो नेपाली समुदाय न्युयोर्क सिटीमा बस्दै आएको छ । न्युयोर्क सिटीको नेपालको झण्डा फहराउनु कति महत्वपूर्ण छ भन्ने कुराको महत्वबोध गर्न पाएकोमा म न्युयोर्कको सिटीको ११० औं मेयरको हैसियतमा गर्व गर्दछु । म नेपाली समुदायलाई योगदानका लागि धन्यवाद दिन चाहन्छु ।’
न्युयोर्क सिटीमा विविधताको महत्व कति छ भन्ने कुरा देखाउन सफल भएको भन्दै उनले नेपाली समुदायलाई धन्यवाद दिए । उनले भने – ‘तपाई एकैछिन यो क्षणको बारेमा सोंच्नुहोस् । अमेरिका विश्वमा एउटामात्र त्यस्तो देश हो, जहाँ तपाईले नयाँ भूमी अँगाल्दा पनि तपाईको सम्पदालाई नत्याग्न भनिन्छ । तपाईले आफ्नो पहिचान दिंदा पनि नेपाली अमेरिकनका रुपमा दिनुहुन्छ । जसरी मैले अफ्रिकन अमेरिकनका रुपमा दिन्छु । पोलिस अमेरिकन, जर्मन अमेरिकन, चाइनिज अमेरिकन, जापानिज अमेरिकन लगायत हरेक आप्रवासीका पछाडि आफ्नो देशको पहिचान जोडिएको हुन्छ । यसरी जोडिदा तपाईको मातृभूमि र संस्कृति सुरुमा जोडिएर आउँछ । जसका कारण तपाईले अमेरिकालाई माया गरिरहँदा पनि आफू जन्मेको वा आफ्नो मूल भएको देशको पहिचानलाई त्याग्नु पर्दैन ।’
मेयर आडम्सले अगाडि भने – ‘हामी तपाई हाम्रा सबै संस्कृतिको समावेशीता सँगै ल्याउन चाहन्छौं । र हामी विविधताको यो अदभुत प्रयोग उत्पादन गर्दछौं र हामी एकतामा सँगै बस्छौं । न्युयोर्क सिटीमा नेपाली समुदायको ठूलो योगदान छ । तपाईहरु फस्ट रेस्पोण्डर हुनुहुन्छ, व्यवसायी हुनुहुन्छ, हाम्रो शिक्षाको भाग हुनुहुन्छ । तपाईहरु न्युयोर्क सिटीको संरचना र जगको भाग हुनुहुन्छ । तपाईहरु परिवार, आस्था, सुरक्षा र व्यवसायका साथै यो देशको महानतामा विश्वास गर्नुहुन्छ । त्यसैले म आज नेपालको झण्डा फहराउन पाउँदा गर्वको अनुभव गर्छु । हामी नेपाली समुदाय अमेरिकाका अभिन्न अंग भएकोमा गर्व गर्दै झण्डा फहराउछौं । हाम्रो गोप्य हतियार नै विविधता हो । जबसम्म हामी त्यो विविधताको कदर गर्दछौं, हामी अमेरिकी सपनाको हिस्सा बन्दै अगाडि बढ्न जारी राख्नेछौं ।’
मेयर आडम्सले अमेरिकी झण्डाको समान उचाई र हैसियतमा नेपालको झण्डा फहराएका छन् । पहिले अमेरिकाको झण्डा फहराएपछि उनले सँगै रहेको समानान्तर पोलमा नेपालको झण्डा फहराएका थिए । यो झण्डा अबको केहीदिन सम्म न्युयोर्क सिटीको अत्यन्तै महत्वपूर्ण फाइनान्सियल डिस्ट्रिक्टमा फहराइरहनेछ । हरेक दिन हजारौं पर्यटकहरुले भ्रमण गरेर तस्वीर खिच्ने चार्जिङ बुल अगाडि यो झण्डा आगामी केहीसातासम्म फहराउने छ ।
झण्डा फहराउने उक्त कार्यक्रम माइनोरिटी इम्पावरमेन्ट नेटवर्ककी कार्यकारी निर्देशक श्रेया तुलाधरको मन्तव्यबाट सुरुवात भएको थियो । उनले आफू न्युयोर्क सिटीभन्दा बस्न मन लाग्ने अर्को ठाउँ नभएको उल्लेख गर्दै आफ्नो कथा सुनाइन् । विजय नकर्मी द्वारा कोरियोग्राफीमा बसन्त डान्सरहरुदे मनमोहक सांस्कृतिक नृत्य प्रस्तुतिको साथ कार्यक्रम अगाडि बढेको थियो । त्यसपछि गेमी टकसेरा सोसाइटीले ढोल बजाएर उत्साहजनक प्रदर्शन गर्दा समुदायका सदस्यहरू तालमा रमाए । बलिङ ग्रीन पार्क एसोसिएसनका अध्यक्ष आर्थर पिकोलोले यस पार्कमा सन् १९९६ देखि नै झण्डा फहराइदै आएपनि अहिलेसम्म फहराएको अद्वीतीय र फरक झण्डा नेपालको रहेको उल्लेख गरे ।
न्युयोर्क सिटी मेयर कार्यालयका अन्तर्राष्ट्रिय मामिलाका डेपुटी कमिश्नर दिलीप चौहानले नेपाली समुदायका लागि यो क्षण गौरवको क्षण भएको बताए । उनले कार्यक्रमको आयोजनामा अग्रपंक्तिमा रहेर सहयोग गरेका थिए ।
कार्यक्रममा आप्रवासी मामिलाको कार्यालयका कमिश्नर म्यानुअल क्यास्ट्रोले नेपाली समुदायमा थप सक्रिय हुन इच्छा व्यक्त गरे ।
मेयरको अन्तर्राष्ट्रिय मामिला कार्यालयका कमिश्नर एडवर्ड मर्मेलस्टिनले नेपाली समुदायलाई झण्डा फहराउने समारोहका लागि बधाई दिए ।
मेयरको आपतकालीन सेवा कार्यालयका कमिश्नर जैच इस्कोलले आफ्नो बुबा र उनकी दिवंगत आमाले नेपालमा विवाह गरेको र नेपालसँगको सम्बन्ध गहिरो भएको तथा आफू नेपालमा नै आमाको गर्भमा बसेको कथा सुनाए ।
यो कार्यक्रम आफ्नी आमाले पनि देख्न पाएको भए निकै खुशी हुने मन्तव्य व्यक्त गर्दा उपस्थीतहरु भावुक भएका थिए ।
कार्यक्रममा निर्वाचित जनप्रतिनिधिहरुको समेत सहभागिता रहेको थियो । न्युयोर्क राज्य संसदकी सांसदहरु जेनिफर राजकुमार र स्टीवन रागा, न्युयोर्क सिटी काउन्सिल सदस्य जुली वोन लगायतले नेपाली समुदायलाई बधाई दिदै मन्तव्य राखेका थिए । जेनिफर राजकुमारको पहलमा नेपाली समुदायको सम्मानमा विगतमा पनि न्युयोर्कले नेपाल डे, माउन्ट एभरेष्ट डे लगायतका दिवसहरु पारित गरिसकेको छ । उनले नेपाली समुदायलाई आफ्नो आवाज सुन्न र उत्साहका साथ मतदाता नामावलीमा नाम दर्ता गर्न आग्रह गरिन् । उनले मेयरसँग यस वर्ष दीपावलीलाई स्कूल बिदाको रूपमा समावेश गर्न मद्दत गरेको समेत उल्लेख गरिन् ।
त्यस्तै राज्य सांसद स्टीवन रागाले आफ्नो निर्वाचन क्षेत्रमा ठूलो नेपाली समुदाय र नेपाली व्यवसायहरु उल्लेख गर्दै आफू सधै नेपाली समुदायलाई सहयोग गर्न उत्सकु रहेको बताए ।
जुली वोनले जय नेपालको नारा लगाउँदै दर्शकलाई उत्साहित बनाइन् ।
कार्यक्रममा कानुन व्यवसायी खगेन्द्र जिसीले ३० वर्षअघि जागिर खोज्दै वाल स्ट्रीटमा जाँदा त्यहाँका मानिसहरूलाई नेपाल भनेको थाहा नभएको तर अहिले त्यही वाल स्ट्रीटमा नेपालको झण्डा फहराउन पाउँदा गर्व लागेको बताए ।
माइनोरिटी इम्पावरमेन्ट नेटवर्कका अध्यक्ष श्याम कार्कीले कार्यक्रम सफल बनाउन सहयोग गर्ने सबैलाई धन्यवाद दिए । कार्कीको कडा परिश्रम र प्रयासको लागि समुदायले उनको प्रशंसा गरेको छ।
कार्यक्रममा नेपालका कार्यवाहक महावाणिज्यदूत विष्णु गौतमले यस ऐतिहासिक कार्यक्रममा सहभागी हुन पाएकोमा खुशी व्यक्त गर्दै अमेरिकामा रहेको नेपाली समुदायलाई बधाई दिए ।
उनले मेयर आडम्सलाई गैडा उपहार समेत दिएका थिए ।
कभर फोटो: प्रदीप परियार थापा/ नेपालिज्म