अमेरिकाको टेक्सास विश्वविद्यालयको इन्टरनेटमा टिकटक प्रतिबन्ध
प्रकाशित मिति : माघ ३, २०७९ मंगलबार
अमेरिकामा अस्टिनको टेक्सास विश्वविद्यालयले आफ्नो इन्टरनेट नेटवर्कमा सोशल मिडिया प्लेटफर्म टिकटकमा पहुँच प्रतिबन्ध लगाएको छ। युनिभर्सिटीले मंगलबार आफ्नो वाईफाइ लगायत सबै प्रकारको इन्टरनेट नेटवर्कमा टिकटक खुल्न प्रतिबन्ध लगाएको विद्यार्थीहरूलाई जानकारी दिएको छ ।
टिकटकले निम्त्याउने साइबर सुरक्षा जोखिम हटाउन यो कदम चालेको युनिभर्सिटीले जनाएको छ । ५२ हजार भन्दा बढी विद्यार्थीहरूको क्याम्पसमा टिकटकको प्रतिबन्ध नयाँ कदम हो । सरकारी उपकरणमा भने अमेरिकामा संघीयस्तरमा र कैयन राज्यहरुले टिकटकको प्रयोगमा रोक लगाइसकेका छन् ।
टिकटकले चिनियाँ सरकारलाई संवेदनशील सूचनाहरू आपूर्ति गर्नसक्नेबारे अमेरिकामा सङ्घीय र राज्य स्तरमा चिन्ता बढाएको हो । विश्वविद्यालयको एथलेटिक विभागसँग टिकटक एकाउन्ट छ जसमा लगभग २ लाख ६० हजार फलोअरहरू छन्। तर नोभेम्बर देखि प्लेटफर्ममा पोस्ट गरिएको छैन।
न्यू जर्सीका डेमोक्रेटिक गभर्नर फिल मर्फीले यस महिनाको सुरुमा राज्य उपकरणहरूमा टिकटक एप प्रतिबन्ध लगाउन आदेश दिएका छन् । अमेरिकामा कम्तिमा २४अन्य राज्यहरूले यस्तै कदम चालेका छन् ।