नेपाली जनसम्पर्क समिति अमेरिकाका केन्द्रीय सल्लाहकार लामिछानेको कोलोराडोमा निधन

खसोखास अमेरिका ब्यूरो

---

प्रकाशित मिति : पुस २९, २०७९ शुक्रबार

नेपाली जनसम्पर्क समिति अमेरिकाका केन्द्रीय सल्लाहकार तथा प्रजातान्त्रिक आन्दोलनमा अग्रणी भूमिका निभाएका व्यक्तित्व अमेरिका निवासी बुद्धिप्रसाद लामिछानेको कोलोराडोमा निधन भएको छ । ५९ बर्षीय लामिछानेको बिहिबार बेलुका निधन भएको नेपाली जनसम्पर्क समिति अमेरिकाले जानकारी दिएको छ ।

केहीपहिले झण्डै एकमहिना अस्पतालको उपचारपछि घर फर्किनुभएका लामिछाने झण्डै एकसाता अगाडि पुन अस्पताल भर्ना हुनुभएको थियो । श्रीमति, तीन छोरी र एक छोरासहित अमेरिका बस्दै आउनुभएका लामिछाने एनआरएन अमेरिकाका पूर्व सल्लाहकार समेत हुनुहुन्थ्यो ।

नेपाल विद्यार्थी संघ गोरखाको सभापति, नेपाली काँग्रेस गोरखाका सचिव हुदै पार्टी सभापति समेत हुनुभएका लामिछाने लामो समयदेखि नेपाली काँग्रेसको राजनीतिमा सकृय रहदै आउनुभएको थियो । झण्डै डेढदशक पहिले अमेरिका बसाई सर्नुभएका लामिछाने अमेरिकामा विभिन्न सामाजिक गतिविधिमा संलग्न रहदै आउनुभएको थियो ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

नेपाली जनसम्पर्क समिति अमेरिकाका सभापति आनन्द बिष्टले लामिछानेको देहवसानको खबरले समिति स्तब्ध भएको बताउनुभएको छ । उहाँले यस दुखद घडीमा अभिभावक नेता लामिछानेको आत्माको चीर शान्तिको कामना गर्दै भावपूर्ण श्रद्धान्जली अर्पण गर्नुभएको छ । साथै शोकाकूल सम्पूर्ण परिवारजनप्रति गहिरो समवेदना व्यक्त गर्नुभएको छ ।

नेपाली जनसम्पर्क समिति अमेरिकाका केन्द्रीय सदस्य गोविन्द लम्सालले लामिछानेको निधनप्रति दुख व्यक्त गर्दै भन्नुभयो – ‘हामीले अभिभावक गुमाएका छौं । काँग्रेसका जुनसुकै आन्दोलनमा पनि अग्रणी भूमिका निर्वाह गरेका व्यक्तिको निधनले अपूरणीय क्षति भएको छ ।’