भीषण शीतआँधीका कारण न्युयोर्कको बफेलोमा ७ जनाको मृत्यु,अमेरिकाभर ज्यान गुमाउनेहरु २३
प्रकाशित मिति : पुस १०, २०७९ आईतबार
A winter storm rolls through Western New York Saturday, Dec. 24, 2022, in Amherst N.Y. A battering winter storm has knocked out power to hundreds of thousands of homes homes and businesses across the United States on Saturday. It left millions more to worry about the prospect of further outages and crippled police and fire departments. (AP Photo/Jeffrey T. Barnes)
न्युयोर्कको बफेलोमा बम चक्रवात भनेर चिनिने कडा शीतआँधीको परिणाम स्वरूप सात व्यक्तिको मृत्यु भएको अधिकारीहरुले पुष्टि गरेका छन् । एरी काउन्टीका कार्यकारी मार्क पोलोनकार्जले आइतबार ट्वीट गर्दै थप चार जनाको मृत्यु भएको पत्ता लगाएपछि मृत्यु हुनेको संख्या तीनबाट सातमा बढेको बताएका हुन् ।
तूफान जस्तै शक्तिशाली हावाहुरी र हिमपातको अवस्थाकाले जनजीवन प्रभावित भएको हो । बफेलो एयरपोर्ट मंगलबारसम्म बन्द छ। न्युयोर्कका गभर्नर क्याथी होकुलले सहरका प्रायः सबै फायर ट्रकहरू परिस्थितिका कारण फसेको बताएकी छिन् ।
राष्ट्रिय मौसम सेवाले आइतबार बिहान ७ बजेसम्म बफेलोको विमानस्थलमा ४३ इन्च हिमपात भएको जनाएको छ। उद्दारकर्मीहरु समयमै पुग्न नसक्दा बफेलो क्षेत्रमा दुई जनाको मृत्यु भएको थियो । नियाग्रा काउन्टीमा कार्बन मोनोअक्साइड विषाक्तताबाट अर्का न्यूयोर्कवासीको मृत्यु भएको छ।
अमेरिकाभर चिसो मौसमका कारण कम्तीमा २४ जनाको मृत्यु भएको छ । ओहायो, कन्सास, भर्मन्ट, कोलोराडो, विस्कन्सिन र मिजौरीमा पनि मौसम सम्बन्धी मृत्यु पनि रिपोर्ट गरिएको छ ।
तापक्रम मिनियापोलिसमा माइनस ९ डिग्री, शिकागोमा २ डिग्री, डेनभरमा ३ डिग्री, न्यूयोर्कमा १५ डिग्री, एट्लान्टामा १६ डिग्री र डलासमा २१ डिग्री तापक्रम झर्ने पूर्वानुमान गरिएको थियो । आइतबार विहान मेन, न्युयोर्क, न्यु ह्याम्पशायर, भर्जिनिया र फ्लोरिडामा क्रिसमसको बिहान १ लाख ६५ हजार भन्दा बढी ग्राहकहरू विद्युतविहिन थिए ।
क्रिसमसको पूर्वसन्ध्यामा अमेरिकामा ३ हजार भन्दा बढी उडानहरू रद्द गरिएका थिए र क्रिसमसको दिनमा अहिलेसम्म १७ सय भन्दा बढी उडानहरू रद्द गरिएका छन्।
न्युयोर्कमा खराब मौषमका कारण रातभर गाडीमा फस्नेमा कैयन नेपालीहरु समेत
न्युयोर्कको बफेलो क्षेत्रमा गाडीमा फस्नेमा कैयन नेपालीहरु समेत रहेका छन् । बफेलो क्षेत्रमा यात्रा गर्ने क्रममा र दैनिक कामका लागि आवतजावत गर्ने क्रममा उनीहरु गाडीमा फसेका थिए ।
बफेलो क्षेत्रमा काममा जाने क्रममा ५ जना नेपालीहरु हिजो दिउसो २ बजेदेखि फसेकोमा २६ घण्टापछि शनिबार दिउसो ४ बजेतिरमात्र सकुशल सुरक्षित स्थानमा पुगेको त्यहाँबाट लोकनाथ अधिकारीले जानकारी दिनुभयो । उनीहरु तेल बचाउन एउटै गाडीभित्र बसेका थिए भने २६ घण्टापछि गाडी त्यही छाडेर सुरक्षित स्थानमा पुग्न सफल भएका थिए ।
त्यस्तै बफेलो क्षेत्रहुँदै गन्तव्यमा जादै गरेका ४ जना नेपालीभाषीहरु पनि रातभर फसेका थिए । उनीहरु हिजो दिउसो ४ बजेदेखि बफेलोको साउथ पार्कमा फसेकोमा विहान ८ बजे गाडी छाडेर सुरक्षित स्थलमा पुग्न सफल भएका थिए । उनीहरुले त्यसक्षेत्रका नेपालीहरुलाई सम्पर्क गरेर उनीहरुको घरमा पुग्न सफल भएको जनाइएको छ ।
गाडीमा पेट्रोल हाल्ने क्रममा किनेको एककप कफी गाडीभित्र रहेकाले त्यही एककप कफी ४ जनाले बाँडेर खाएको भरमा उनीहरुले १६ घण्टा गाडीमा बिताएका थिए । गाडीमा तेल सकिएपछि उनीहरु गाडीबाट बाहिर निस्केर सुरक्षित स्थानमा पुग्न सफल भएका थिए । हिमपात र हावाहुरीका कारण आवागमनमा असर परेको र भिजिबिलिटी समेत नभएकाले समस्या भएको त्यहाँबाट लोकनाथ अधिकारीले जानकारी दिनुभयो ।
फसेका व्यक्तिले प्रहरीलाई खबर गर्दा प्रहरीले समेत केही गर्न नसक्ने बताएको थियो । प्रहरीले बासिन्दाहरूलाई उनीहरूको जीवन खतरामा नभएसम्म ९११ मा फोन गर्न निरुत्साहित गरेको छ । त्यसक्षेत्रमा कैयन नेपालीहरुका घरमा समेत विद्युत आपूर्तिमा अवरोध उत्पन्न भएको छ ।
