अमेरिकी सांसदहरूबाट अमेरिकामा टिकटकमाथि प्रतिबन्ध लगाउने विधेयक पेश
प्रकाशित मिति : मंसिर २७, २०७९ मंगलबार
अमेरिकामा टिक टकलाई सञ्चालन गर्नबाट प्रतिबन्ध लगाउने उद्देश्यका साथ अमेरिकी सांसदहरूको समुहले नयाँ विधेयक पेश गरेका छन् । रिपब्लिकन र डेमोक्रेटिक सांसदहरूको द्विदलीय समूहले टिकटकलाई प्रतिबन्ध लगाउने विधेयक ल्याएको हो ।
यो विधेयक टिकटक कम्पनीमा चिनियाँ सरकारको सम्भावित प्रभावको बारेमा ट्रम्प र बाइडेन प्रशासनको व्यापक चिन्ता पछि आएको हो। यो विधेयक पारित भएमा अमेरिकामा टिकटकमा प्रतिबन्ध लगाइनेछ।
चिनियाँ कम्पनी बाइटडान्सको स्वामित्वमा रहेको टिकटकले अमेरिकामा चिनियाँ सरकारी अधिकारीहरूले चिनियाँ कानून अन्तर्गत अमेरिकी प्रयोगकर्ताको डाटामा पहुँच प्राप्त गर्न सक्ने डर पैदा गरेको छ । यद्यपी अमेरिकी प्रयोगकर्ताका डाटा सुरक्षित रूपमा चीन बाहिर भण्डारण गरिएको टिकटकले बताउदै आएको छ ।
नयाँ विधेयक रिपब्लिकन सिनेटर मार्को रुबियो, प्रतिनिधिसभामा रिपब्लिकन सांसद माइक गैलाघर, र डेमोक्रेटिक सांसद राजा कृष्णमूर्तिले ल्याएका हुन् । नयाँ विधेयकले चीन, रुस वा अन्य कुनै विदेशी सरकारको प्रभावमा रहेका सामाजिक सञ्जालहरुलाई अमेरिकामा प्रतिबन्ध लगाउनेछ।
रिपब्लिकन गभर्नरहरुले विभिन्न राज्यमा सरकारको स्वामित्वमा रहेका उपकरणहरूमा टिकटकको प्रयोगहरुम प्रतिबन्धहरु लगाइरहँदा यो विधेयक आएको हो । गत दुई हप्तामा मेरिल्याण्ड, साउथ डाकोटा र युटाह लगायत कम्तिमा सात राज्यहरूले राज्यका सरकारी उपकरणमा टिकटमा प्रतिबन्ध लगाएका छन् ।