न्युयोर्कमा यसरी मनाइयो छठ

खसोखास अमेरिका ब्यूरो

---

प्रकाशित मिति : कार्तिक १४, २०७९ सोमबार

फोटो:  अजित शाह

नेपालको तराई क्षेत्रमा श्रद्धा र भक्तिपूर्वक मनाइने छठपर्व अमेरिकामा बस्ने तराईबासी नेपालीहरुले पनि मनाएका छन् । वेस्टचेस्टरमा न्युयोर्कमा बस्ने तराईबासी नेपालीहरुले श्रद्धा , भक्ति र विधिपूर्वक छठपर्व मनाएका हुन् । वेस्टचेस्टरको स्कारडेलमा अवस्थित डियरहिल लेनमा धार्मिक विधिपूर्वक छठपर्व मनाइएको हो ।

सामाजिक व्यक्तित्व डाक्टर विनोद शाह र उहाँकी धर्मपत्नी सुजाता शाहको आयोजनामा गरिएको छठपूजामा न्युयोर्क निवासी नेपालीहरुको बाक्लो उपस्थीति रहेको थियो । आइतबार साँझ अस्ताउँदो सूर्यको र सोमबार विहान उदाउँदो सूर्यको पूजा आराधना गरेर छठपर्व मनाइएको हो । छठपर्व मनाउदा परम्पराअनुसार छठीमाताको भजन गाइएको थियो ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

नेपालमा परिवारका सबै सदस्यहरु बसेर अझ रमाइलोका साथ छठपर्व मनाउने भएपनि अमेरिकामा यसरी जम्मा भएर छठपर्व मनाउन पाउनु निकै खुशीको कुरा रहेको डाक्टर विनोद शाहको भनाई छ । पंचमीका दिनदेखि ब्रत बस्ने महिलाले निष्ठापूर्वक जलाशयमा स्नान गरी छठपर्व मनाउने परम्परालाई नै कायम राख्दै छठपर्व मनाइएको हो ।

परम्परा अनुसार छठका दिन सांझ अस्ताउदो सूर्यलाई जलाशयमा उभिएर पुजासहित अर्घ दिइएको थियो । पूजामा शाहपत्नी सुजाता शाह लगायत सहभागी हुनुभएको थियो । प्राकृतिक जलाशयमा छठ मनाउन सम्भव नभएपनि कृतिम पोखरीको पानीमा डूबुल्की मारेर अस्ताउदो सूर्यलाई अर्घ दिइएको हो । अस्ताउदो सूर्यलाई अर्घ दिएको भोलिपल्ट उदाउदो सूर्यलाई पनि अर्घ दिएर छठ पूजाको विसर्जन गर्ने चलन रहेको छ ।

पवित्र मनले छठ पर्व मनाउदा पारिवारिक कल्याण, सन्तानसुख र मनोकामना पूरा हुने विश्वास रहेको छ । छठ मनाउन वेस्टचेस्टर पुगेका तराईबासी नेपालीहरुले सूर्यको उपासना गरी संस्कृति र परम्पराअनुसार छठको विसर्जन गरेका हुन् ।

शुद्ध भावनाले ब्रत गर्नाले तुरुन्त फल पाइने विश्वास रहेकाले ब्रतालुहरुले मात्र नभइ ब्रतालुका परिवारले समेत संस्कृतिको पालना गरेका थिए । छठको प्रसाद पनि नेपाली परम्परा अनुसार नै नरिवल , केरा , सुन्तला लगायतका फलपूmहरु राखेर तयार पारिएको थियो ।

समाजमा उदाउदो र प्रतिष्ठितलाई सबैले ढोग्ने र डूब्न लागेको घाम अर्थात् गरिब र बेसहारालाई कसैले नहेर्ने प्रचलन रहेपनि अमेरिकामा बस्ने तराईबासी नेपालीहरुले परम्पराअनुसार उदाउदो र डूब्न लागेको सूर्यको आराधना गरेर जुनसुकै अवस्थामा पनि सबैलाई समान व्यवहार गर्नुपर्छ भन्ने सन्देश समेत दिएका छन् ।

डाक्टर विनोद शाह र उहाँकी पत्नी सुजाता शाहले विगत केही वर्षदेखि यसरी नै छठपूजाको आयोजना गर्दै आउनुभएको छ ।