८७ बर्षकी ७ जनाकी हजुरआमाबाट मास्टर्स डिग्री, भन्छिन् ‘जीवनको लक्ष्य अन्तिमसम्म पछ्याउनुपर्छ’
८७ बर्षकी बरथा षणमुगनाथले क्यानडाको योर्क युनिभर्सिटीबाट मास्टर्स डिग्री हासिल गरेकी छिन् । ७ जनाकी हजुरआमा षणमुगनाथ उक्त युनिभर्सिटीबाट मास्टर्स डिग्री हासिल गर्ने सबैभन्दा बढी उमेरकी व्यक्ति हुन् ।
श्रीलंकाकाको सानो गाउँ बेलानाईमा जन्मिएकी उनले सन् २०१९ बाट आफ्नो अध्ययन सुरु गरेकी थिइन् । युनिभर्सिटीले बृद्धबृद्धाका लागि निशुल्क ट्युशन अफर गरेको थाहा पाएपछि उनले मास्टर्स डिग्री गर्ने निर्णय गरेकी थिइन् ।
षणमुगनाथले राजनीतिशास्त्रमा मास्टर्स डिग्री हासिल गरेकी हुन् । ८७ बर्षको उमेरमा आफ्ना नातीनातिनीसँग खेलेरमात्र नबसी उनी आफ्नो सपना पूरा गर्ने लागिपरेकी हुन् । नोभेम्बर १ मा आफू साधारण महिलामात्र रहेको र नोभेम्बर २ मा मास्टर्स डिग्री हासिल गरेपछि आफ्नो जीवन नै परिवर्तन भएको उनले बताइन् ।
षणमुगनाथको मास्टर्स डिग्री श्रीलंकाको गृहयुद्ध र शान्तिका लागि भएका प्रयासमा केन्द्रीत रहेको थियो । राजनीतिशास्त्रमा मास्टर्स डिग्री गर्ने सपना पूरा भएकोमा उनले खुशी व्यक्त गरेकी छिन् । मान्छेको जीवनमा सधै लक्ष्य हुनुपर्ने र अन्तिमसम्म पनि उक्त लक्ष्यलाई पछ्याउनुपर्ने उनले बताइन् ।
