टेक्सासमा गर्भपतनबारेको कानून कार्यान्यन रोक्ने तल्लो अदालतको आदेश पुनरावेदनबाट ‘होल्ड’
प्रकाशित मिति : आश्विन २२, २०७८ शुक्रबार
टेक्सासमा गर्भपतनबारेको कानून कार्यान्यन रोक्ने डिस्ट्रिक्ट कोर्टको आदेश पुनरावेदन अदालतले ‘होल्ड’ गरिदिएको छ । पाँचौं सर्किट कोर्टले शुक्रबार राती दिएको आदेशमा डिस्ट्रिक्ट कोर्टका न्यायाधिस रोबर्ट पिटम्यानले गर्भपतनबारेको कानून कार्यान्वयनमा रोक लगाउँदै दिएको आदेशलाई ‘होल्ड’ गरिदिएको हो । डिस्ट्रिक्ट कोर्टले कानून कार्यान्वयनमा रोक लगाएपछि टेक्सासले पुनरावेदन अदालतमा मुद्दा दायर गरेको थियो ।
डिस्ट्रिक्ट कोर्टको आदेशपछि टेक्सासका केही क्लीनिकहरुले ६ साताभन्दा बढीको गर्भ रहेकाहरुका लागि समेत गर्भपर्तन सेवा सुचारु गरेका थिए । अमेरिकाको टेक्सासले गर्भपतनबारेको अहिलेसम्मकै सबैभन्दा कडा कानून ल्याएपछि त्यसबारे विरोध र कानूनी लडाई जारी रहेको छ ।
उक्त कानून कार्यान्वयनमा रोक लगाउनका लागि सर्वोच्च समक्ष आपतकालिन अनुरोध गरिएकोमा सर्वोच्चले पनि कानून कार्यान्वयनमा रोक लगाउन अस्वीकार गरिसकेको छ । जसका कारण टेक्सासलाई कानून कार्यान्वयनका लागि बाटो खुलेको थियो ।
सर्वोच्चका ९ जना न्यायाधिसहरुमध्ये ५ जनाले टेक्सासको कानूनको समर्थन गरेका थिए भने ४ जना उक्त कानून कार्यान्वयनमा रोक लगाउनुपर्ने पक्षमा रहेका थिए । दुईजना रुढीबादी न्यायाधिसहरुलाई ३ जना ट्रम्प नियुक्त न्यायाधिसहरुले समर्थन गरेका थिए । तीनजना उदार न्यायाधिस र रुढीबादी धारका मानिने प्रधान न्यायाधिस जोन रोबर्टस भने टेक्सासको कानूनमा असहमत भएका थिए ।
टेक्सासको गर्भपतनबारेको कानूनबिरुद्ध टेक्सासको राज्य अदालत लगायतका अन्य कानूनी निकायमा मुद्दा दायरका लागि भने रोक लगाइएको थिएन । त्यसैले उक्त कानून कार्यान्वयनबिरुद्ध टेक्सासको डिस्ट्रिक्ट कोर्टमा मुद्दा दायर गरिएको थियो ।
यो कानून अनुशार अधिकांश मामलामा ६ साताभन्दा बढीको गर्भपतन गर्न नपाइने भएको छ । गत मे महिनामा पारित भएको यो कानून सर्वोच्च अदालतको नजिरसँग भने बाझिएको छ । सर्वोच्चको नजिरमा भ्रुण परिपक्व हुनु अगाडि गर्भपतन गर्न पाइने र राज्यहरुले त्यसमा रोक लगाउन नहुने उल्लेख छ । सामान्यतया २२ देखि २४ हप्तामा भ्रुण परिपक्व हुने भएकाले त्यो भन्दा अगाडि गर्भपतनका लागि सर्वोच्चले रोक लगाएको छैन ।
टेक्सासको कानून कार्यान्वयनमा आएपछि यदि ६ साताभन्दा बढीको गर्भपतन गराएको खण्डमा गर्भपतन सेवा उपलब्ध गराउनेबिरुद्ध मुद्दा दायर गर्न सकिन्छ । त्यस्तै गर्भपतनको लागि क्लीनिक लैजानका लागि सवारी दिने वा गर्भपतनका लागि आर्थिक सहायता गर्नेबिरुद्धपनि मुद्दा लाग्छ ।