यी हुन् विश्वकै शक्तिशाली पासपोर्ट, अमेरिकाको शक्तिशालीमा सातौं, नेपालको कमजोरमा सातौं
प्रकाशित मिति : आश्विन २०, २०७८ बुधबार
जापान र सिंगापुरको पासपोर्ट विश्वको पासपोर्ट सुचकांकमा पहिलो नम्बरमा आएका छन् । कोरोना महामारीका कारण कैयन देशहरुमा लगाइएको यात्रा प्रतिबन्धहरु खुकुलो हुँदै गएको बेलामा हेन्ली पासपोर्ट सुचकांकले यो सुची प्रकाशित गरेको हो ।
अगाडि नै भिसा नलिइकनै यात्रा गर्नसकिने देशहरुको संख्याको आधारमा यो सुची तयार गरिएको हो । अन्तर्राष्ट्रिय हवाई यातायात संघबाट प्रदान गरिएको तथ्यांकका आधारमा यो सुची तयार गरिएको हो ।
जापान र सिंगापुरको पासपोर्टले विश्वका १९२ वटा देशमा पहिले नै भिसा नलिइ अर्थात् अन अराइभल भिसामा जान सकिन्छ । दक्षिण कोरिया र जर्मनी दोश्रो शक्तिशाली पासपोर्टका रुपमा रहेका छन् । यी पासपोर्टबाट १९० देशमा जान पहिले नै भिसा लिनुपर्दैन ।
फिनल्याण्ड, इटली, लक्जम्बर्ग र स्पेनको पासपोर्टबाट १८९ देशमा जान पहिले नै भिसा लिनु पर्दैन । यी देशको पासपोर्ट सुचीमा तेश्रो नम्बरमा छ । चौथोमा १८८ देश जान सकिने अष्ट्रिया र डेनमार्कको पासपोर्ट छ । पाँचौंमा फ्रान्स, आयरल्याण्ड, न्युजील्याण्ड, पोर्चुगल र स्वीडेनको पासपोर्टबाट पहिले नै भिसा नलिई १८७ देश जान सकिन्छ ।
छैठौंमा बेल्जियम, न्युजील्याण्ड र स्वीट्जरल्याण्डको पासपोर्ट रहेको छ । जसबाट १८६ देशमा जान पहिले नै भिसा लिनुपर्दैन । सातौंमा अमेरिका, यूके, नर्वे, माल्टा, ग्रिस र चेक रिपब्लिकको पासपोर्ट रहेको छ । यी पासपोर्ट वाहकले १८५ देशमा प्रवेशका लागि पहिले नै भिसा लिनु पर्दैन ।
आठौंमा १८४ देश पहिले नै भिसा नलिई जान सकिने अष्ट्रेलिया र क्यानडाका पासपोर्ट रहेका छन् । नवौंमा १८३ देश प्रवेश गर्न पहिले नै भिसा लिनु नपर्ने हंगेरी र दशौंमा १८२ देश प्रवेश गर्न पहिले नै भिसा लिनु नपर्ने लिथुवानिया, पोल्याण्ड र स्लोभाकिया रहेका छन् ।
सबैभन्दा कमजोर अफगानिस्तानको पासपोर्ट रहेको छ, जसबाट जम्मा २६ देशमा जान पहिले नै भिसा लिनु पर्दैन । त्यस्तै दोश्रोमा कमजोर २८ देश पहिले नै भिसा नलिई जान सकिने इराकको पासपोर्ट र तेश्रोमा कमजोर २९ देश पहिले नै भिसा नलिई जान सकिने सिरियाको पासपोर्ट रहेको छ । चौथोमा कमजोर ३१ देश जान सकिने पाकिस्तानको र पाँचौं कमजोर पासपोर्ट ३३ देश जान सकिने यमनको रहेको छ ।
३४ देश जान सकिने सोमालियाको पासपोर्ट सबैभन्दा कमजोरमा छैठौं नम्बरमा रहेको छ । नेपालको पासपोर्ट सबैभन्दा कमजोरमा सातौं नम्बरमा रहेकोछ । नेपालको पासपोर्टबाट विश्वका ३७ देशमा जान सकिन्छ । सातौंमा प्यालेष्टाइनी भूभागको पासपोर्ट पनि रहेको छ ।
उत्तर कोरिायाको पासपोर्ट कमजोरमा आठौं नम्बरमा रहेको छ । जसबाट ३९ देशमा जान पहिले नै भिसा लगाउनु पर्दैन । कमजोरमा नवौं नम्बरमा रहेका बंगालादेश, कोसोभो, लिबियाको पाुपोर्टबाट ४० वटा देशमा जान पहिले नै भिसा लिनु पर्दैन । दशौं नम्बरमा रहेको इरान, लेबनान, सुडान र श्रीलंकाका पासपोर्टबाट जम्मा ४१ वटा देशमा जान पहिले नै भिसा लिनु पर्दैन ।