अमेरिकी बैंकमा ६ सय डलरभन्दा बढीको कारोबार आईआरएसले निगरानी गर्नेबारेको नियम के हो ?
प्रकाशित मिति : आश्विन १६, २०७८ शनिबार
अमेरिकामा ६ सय डलरभन्दा बढीको बैंक कारोबार आईआरएसले निगरानी गर्ने नियमका सन्दर्भमा बहसहरुमात्र भएका छैनन्, भ्रमहरुसमेत श्रृजना भएका छन् । बाइडेन प्रशासनले प्रस्ताव गरेको करबारेको नयाँ कानूनपछि यसबारे बहस र भ्रमहरु उत्पन्न भएका हुन् ।
बाइडेनको ट्रेजरी डिपार्टमेन्टले अमेरिकाका सबै बैंकमा हुने ६ सय डलरभन्दा माथिका कारोबारहरु आइआरएसले निगरानी गर्ने शीर्षकका कैयन समाचारहरु आएका छन् । बैंक एकाउन्टमा हुने कारोबारहरुमा आईआरएसको सिधा पहुच कायम हुने त्रास सेवाग्राहीहरुमा बढेको छ ।
यी दावीहरु तथ्यमा नै आधारित रहेपनि कतिपय विवरणहरु भने बढाईचढाई समेत गरिएका छन् । अहिलेसम्म बाइडेन प्रशासनले यसबारे कुनै निर्णय गरिसकेको छैन, केवल प्रस्तावमात्र अगाडि सारेको हो । ट्रेजरी डिपार्टमेन्टले कानूनमा कुनै परिवर्तन गर्न सक्दैन । केबल संसदलेमात्र सक्छ । यदि बाइडेन प्रशासनको प्रस्ताव कार्यान्वयनमा आएपनि बैंकले हरेक एउटाएउटा कारोबार आईआरएसलाई रिपोर्ट गर्नुपर्ने छैन ।
तर बाइडेन प्रशासनको प्रस्ताव कार्यान्वयनमा आएमा भने अमेरिकाका बैंकहरुले बार्षिक ६ सयभन्दा बढी कारोबार हुने बैंक एकाउन्टहरुमा आईआरएसको पहुच दिनेछन् । अर्थात् बैंक एकाउन्टमा बार्षिक कति रकम आयो र कति रकम खर्च भयो भन्ने एकमुष्ठ विवरणमा आईआरएसको पहुच हुनेछ । तर ६ सय डलरमाथिका हरेक कारोबार वा खर्चमा भने आईआरएसको पहुच कायम हुने होइन ।
यदि कसैको बैक एकाउन्टमा पेपल वा अन्य एप्लीकेशनबाट बार्षिक ६ सय डलरभन्दा बढी रकम आएको छ भने पनि बार्षिक एकमुष्ठ रकमबारे बैंकले आईआरएसलाई विवरण दिनेछ । बैंकले कसलाई कति रकम दिइयो, कुन शीर्षकमा कति खर्च भयो, कुन शीर्षकमा कति आम्दानी भयो भन्नेबारे विस्तृत विवरणमा भने आईआरएसलाई पहुच दिनेछैन ।
बार्षिक रुपमा बैंकमा कति रकम आयो र कति रकम खर्च भयो भन्ने विवरणले व्यक्ति वा संस्थाले आईआरएसमा ट्याक्स फाइल गर्दा भरेको विवरणसँग मेल नखाएमा वा ठूलो अन्तर देखिएमा आईआरएसले त्यस्ता व्यक्ति वा कम्पनीको विवरण अडिट गर्नसक्नेछ । कतिपयले बैंकमा ठूलो कारोबार हुने तर ट्याक्स फाइल गर्दा कम आम्दानीमात्र रिपोर्ट गर्ने देखिएकाले बाइडेन प्रशासनले यस्तो नियम प्रस्ताव गरेको हो ।
ट्याक्सबारेका विज्ञहरुले कारोबार थ्रेसहोल्ड ६ सयडलरमात्र राख्नु अत्यन्तै कम भएको बताएका छन् । ६ सयडलरभन्दामा माथि कारोबार हुने बैंकको बार्षिक कारोबारमा आईआरएसलाई पहुच दिनु उपयुक्त नहुने र ठूला कारोबार हुने बैंकका बार्षिक कारोबारमा मात्र आईआरएसले पहुच दिनु उपयुक्त हुने विज्ञहरु बताउँछन् । कतिपयले अमेरिकाको आर्थिक गोप्यताबारे सरकारले उछिन्न खोजेको आरोप लगाएका छन् ।
यो नियम स्वीकृत भएको खण्डमा सन् २०२२ को डिसेम्बर ३१ पछि लागु हुनेछ । प्रस्तावित नियम लागु हुनका लागि संसदबाट पारित हुनुपर्ने जनाइएको छ । नेब्रास्काले बाइडेन प्रशासनको यो नियम पालना नगर्ने घोषणा गरिसकेको छ । नेब्रास्का राज्यका ट्रेजर जोन मुरान्टेले बाइडेन प्रशासनले आफूबिरुद्ध मुद्दा दायर गरे त्यसलाई झेल्ने तर नेब्रास्काका जनताको आर्थिक गोप्यतामा कुनै समझदारी नगर्ने बताएका छन् ।