हैटीबाट अमेरिकी सेना पठाउन आग्रह, एफबीआई र होमल्याण्ड सेक्युरिटीका अधिकारीहरु हैटी जाँदै
प्रकाशित मिति : असार २६, २०७८ शनिबार
हैटीको सरकारले अमेरिकी सरकारसँग हैटीको सुरक्षाका लागि अमेरिकी सेना पठाउन आग्रह गरेको छ । हैटीका राष्ट्रपति जोभेनल मोइजको हत्यापछि मुख्य संरचनाको संरक्षणका लागि भन्दै हैटीले अमेरिकी टुकडीको माग गरेको हो ।
हैटीको अन्तरिम सरकारले अमेरिकी सरकारसँग सहायता मागिएको पुष्टी गरेको हो । हैटीको भौतिक संरचना, पोर्टहरु, विमानस्थलहरु, उर्जा प्रणाली लगायतको संरक्षणका लागि अमेरिकी सेनाको आग्रह गरिएको हो ।
अन्तरिम प्रधानमन्त्री क्लाउड जोसेफले आफूहरुलाई यो बेलामा अन्तर्राष्ट्रिय सहायता आवश्यक रहेको बताएका हुन् । बाइडेन प्रशासनले भने हैटीमा अमेरिकी सेना पठाउने वा नपठाउने सन्दर्भमा केही बताएको छैन । तर पेन्टागनले हैटीबाट सेनाको आग्रह गरिएको पुष्टी गरिसकेको छ ।
अहिलेका लागि अमेरिकाले हैटीमा एफबीआईका अधिकारीहरु र होमल्याण्ड सेक्युरिटीका अधिकारीहरुमा पठाउने योजना बनाएको छ । हैटीमा भएको घटनाको अनुसन्धानमा सघाउनका लागि अमेरिकाले एफबीआईका अधिकारीहरुलाई यथाशीघ्र पठाउने योजना बनाएको हो ।