न्युयोर्कमा मेयरका लागि प्राइमरीको मतगणनामा १ लाख ३५ हजार परीक्षण मतपत्र मिसिएर गञ्जागोल
प्रकाशित मिति : असार १६, २०७८ बुधबार
न्युयोर्कको प्राइमरी चुनावमा मतदानपछि नेपाल मुलका एक मतदाताले पोष्ट गरेको तस्वीर । तस्वीर: सुनिल महतको फेसबुकबाट
न्युयोर्कको मेयरका लागि भएको डेमोक्रेटिक प्राइमरीको मतगणनाका क्रममा झण्डै १ लाख ३५ हजार परीक्षण मतपत्र मिसिएको खुलासा भएपछि गञ्जागोल भएको छ । मंगलबार निर्वाचन बोर्डले र्यांक च्वाइस मतगणनाको मतपरिणाम सार्वजनिक गरेपछि राती परीक्षण मतपत्रहरु मिसिएको खुलासा भएको थियो ।
निर्वाचन बोर्डले मंगलबार राती ट्वीट गर्दै मतगणनामा परीक्षण मतपत्रहरु मिसिएकाले पुन मतगणना गरिने बताएको छ । परीक्षणका क्रममा प्रयोग भएका मतपत्रका रेकर्डहरु निर्वाचन व्यवस्थापन प्रणालीबाट नहटाइएकाले मतगणना गर्दा ती मतपत्रहरु पनि जोडिएको निर्वाचन आयोगले जनाएको छ ।
— NYC Board of Elections (@BOENYC) June 30, 2021
निर्वाचन व्यवस्थापन प्रणालीले खसालिएका भोटको रेकर्ड सफ्टवेयरबाट निर्माण गर्ने र र्यांक च्वाइस भोटिङ सफ्टवेयरले निर्वाचन व्यवस्थापन प्रणालीले बनाएको खसालिएका भोटको रेकर्ड प्रयोग गर्ने भएकाले परीक्षण मतपत्रको रेकर्ड नहट्दा ती मतहरु पनि गणना भएको निर्वाचन बोर्डको भनाई छ । बोर्डका कर्मचारीहरुले सबै परीक्षण मतपत्रका रेकर्डहरु हटाइसकेको र चुनावको रातीको नतिजा पुन अपलोड गर्ने बोर्डको भनाई छ ।
निर्वाचनमा अग्रता कायम गरेका उम्मेदबार एरिक आडम्सले निर्वाचन आयोगको गल्ती दुर्भाग्यपूर्ण भएको बताएका छन् । साथै उनले निर्वाचन बोर्डले गल्ती स्वीकार गरेकोमा बोर्डको पारदर्शिताको भने प्रशंसा गरेका छन् । त्यस्तै दोश्रो स्थानमा रहेकी क्याथरिन ग्रासियाले निवार्चन बोर्डले गरेको गल्तीका लागि अझ पारदर्शी हुनुपर्ने र पूर्णरुपमा यसको व्ययाख्या गरिनुपर्ने बताएकी छिन् ।
निवार्चन बोर्डले यस अगाडि सार्वजनिक गरको नतिजा पनि वेवसाइटबाट हटाइसकेको छ । र्यांक च्वाइस मतगणनाको प्रारम्भिक नतिजा आज आउने अपेक्षा गरिएको छ ।