कोरोनाको डेल्टा भेरियन्ट फैलिनबाट रोक्न सिड्नीमा शनिबारदेखि कठोर लकडाउन
प्रकाशित मिति : असार १२, २०७८ शनिबार
कोरोना भाइरसको अत्याधिक संक्रामक मानिएको डेल्डा भेरियन्टबिरुद्ध शनिबारदेखि अस्ट्रेलियाको सिड्नीमा कठोर प्रकारको दुईहप्ते लकडाउन सुरु भएको छ । डाउनटाउन सिड्नी र सिटीको पूर्वी क्षेत्रका १० लाखभन्दा धेरै व्यक्ति पहिलेदेखि नै लकडाउनमा रहेपनि कोरोनाको संक्रमणका मामलाहरु बढेपछि लकडाउन विस्तार गरिएको अधिकारीहरुले जनाएका छन् ।
न्यू साउथ वेल्स राज्यले घोषणा गरेको लकडाउनमा ब्लु माउन्टेन्स, सेन्ट्रल कोस्ट लगायतका क्षेत्रहरु पनि समेटिएका छन् । सिड्नीमा शनिबार रातीदेखिको लकडाउनबाट झण्डै ५० लाख व्यक्ति प्रभावित भएका छन् । सन् २०२० को सुरुवातयता यो पूर्णरुपको कठोर प्रकारको लकडाउन हो ।
डेल्टा भेरियन्टका झण्डै एकसय मामलाहरु देखिएपछि लकडाउन घोषणा गरिएको हो । त्यस क्षेत्रका बासिन्दाहरुलाई अत्यावश्यकबाहेक अन्य काममा घरबाहिर ननिस्कन भनिएको छ । अष्ट्रेलियाले सिमानाका बन्द गरेर कोरोनाबिरुद्ध प्रभावकारीरुपमा लडिरहेको अवस्थामा यो लकडाउन गरिएको हो ।
अष्ट्रेलियामा कोरोना संक्रमणका जम्मा ३० हजार ४ सय केसहरु पुष्टी भएका छन् भने कोरोना संक्रमणबाट ९१० जनाको मृत्यु भएको छ । तर भ्याक्सिन वितरणमा भने अष्ट्रेलियाले संघर्ष गर्नुपरेको छ ।