क्यालिफोर्नियाको अदालतले दियो डिभी विजेतालाई दोश्रो मौका, डिसीको मुद्दा मेहताको टेबुलमा
प्रकाशित मिति : जेष्ठ २६, २०७८ बुधबार
अमेरिकाको नर्दन डिस्ट्रिक्ट अफ क्यालिफोर्नियाको डिस्ट्रिक्ट कोर्टले परिवारमा आधारित ग्रिनकार्डका सन्दर्भमा ज्याकोब भर्सेज बाइडेन मुद्दा मुद्दा खारेज गरिदिएको छ । तर २०२१ का डिभी विजेताहरुलाई अर्को मुद्दा दायर गर्नका लागि दोश्रो मौका दिएको छ । परिवारमा आधारित ग्रिनकार्डका सन्दर्भमा सरकारका तर्फबाट फाइल गरिएको मोसनलाई स्वीकार गरिएपनि डिभी विजेताका सन्दर्भमा भने अस्वीकार गरिएको छ । यो मुद्दा गत जनवरी ११ मा दायर गरिएको थियो ।
डिभी २०२१ को अवस्था फरक रहेको र डिभी २०२१ का मुद्दाका सन्दर्भमा अदालतलाई न्याय गर्ने क्षेत्राधिकार रहेको अदालतले स्वीकार गरेको छ । अदाललते डिभी २०२१ का विजेताहरुलाई क्लास एक्सनका लागि उचित रुपमा अभियोगसहित दोश्रो संसोधित मुद्दा दायर गर्न निर्देशन समेत दिएको छ ।
ज्याकोब भर्सेज बाइडेन मुद्दा २१९६ आप्रवासी भिसा आवेदक वा उनीहरुका अमेरिकामा रहेका ग्रिनकार्डवाहक र अमेरिकी नागरिक परिवारका तर्फबाट दायर गरिएको थियो । यो मुद्दामा पनि झण्डै साढे ४ लाख परिवारमा आधारित ग्रिनकार्ड आवेदक र भिसा पाउन नसकेका डिभी २०२१ का विजेताहरुको प्रतिनिधित्व गरिएको थियो । यो मुद्दा ट्रम्पको आप्रवासन रोकमा केन्द्रीत रहेको थियो तर बाइडेन प्रशासनले ट्रम्पको आप्रवासन रोक खारेज गरिसकेकाले यो मुद्दा खारेजीका लागि मोसन फाइल गरेको थियो ।
यो मुद्दामा डिभी विजेताहरुलाई आगामी जुन २२ भित्र संसोधनसहितको मुद्दा दायर गर्न सक्ने अदालतको फैसलामा उल्लेख गरिएको छ । जुलाई २ भित्र सरकारले यो मुद्दाका सन्दर्भमा आफ्नो जवाफ दिनुपर्नेछ । त्यसपछि जुलाई १५ मा मुद्दाबारे सुनुवाई हुने अदालतको फैसलामा उल्लेख गरिएको छ ।
यसैबीच भिसा नपाएका डिभी २०२१ का विजेताहरुका तर्फबाट फाइल गरिएको गुडलक भर्सेज बाइडेन मुद्दा हेर्ने जिम्मा न्यायाधिस अमित मेहतालाई दिइएको छ । वासिंटन डिसीको अदालतका न्यायाधिस मेहताले २०२० को डिभीबारे सकारात्मक कदम चालेका कारण गतबर्षको सेप्टेम्बरमा डिभी २०२० का कैयन विजेताहरुले भिसा पाउन सफल भएका थिए ।
I can report that #GoodluckvBiden has been assigned to U.S. District Court Judge Amit. P. Mehta. #DV2021 https://t.co/LJvCHP1C2x pic.twitter.com/QsM8dqC3G5
— Curtis Morrison (@curtisatlaw) June 8, 2021
अमेरिकाका पूर्व राष्ट्रपति डोनाल्ड ट्रम्पको आप्रवासन रोक खारेजपछि बाइडेन प्रशासनमा पनि भिसा नपाएपछि हजारौं डिभी विजेताका तर्फबाट बाइडेन प्रशासनबिरुद्ध यसैसाता मुद्दा दायर गरिएको हो । ४ हजार ८९ डिभी विजेताहरुका तर्फबाट वासिंटन डिसीमा रहेको अदालतमा दायर गरिएको यो मुद्दाको प्रतिनिधित्व कानून व्यवसायी कुर्तिस मोरिसनले गरेका छन् ।
भिसा पाउनुपर्ने अवधि घर्कदै गएपछि र काठमाडौं स्थीत अमेरिकी दूतावासले डिभी विजेताहरुलाई भिसा जारी नगरेपछि आर्थिक बर्ष सन् २०२१ का नेपाली विजेताहरु पनि चिन्तित र अन्यौलग्रस्त छन् । आर्थिक बर्ष २०२१ मा ३८०१ जना नेपालीहरुले डिभी लोटरी जितेकोमा अहिलेसम्म कसैले पनि भिसा पाउन सकेका छैनन् ।
गतबर्ष कोरोनाको महामारीका कारण अमेरिकी राष्ट्रपति डोनाल्ड ट्रम्पले आप्रवासन रोक लगाउँदै डिभी विजेताहरुको भिसामा समेत प्रतिबन्ध लगाएका थिए । तर अदालतले डिभी विजेताहरुलाई भिसा जारी गर्न सरकारलाई आदेश दिएपछि गतबर्षको सेप्टेम्बरमा डिभी विजेताहरुले भिसा प्राप्त गर्न सफल भएका थिए । उनीहरुले भिसा पाएपनि अध्यागमन रोकका कारण फेब्रअरी अन्तिमसम्म अमेरिका आउन भने पाएका थिएनन् । फेबु्रअरीमा अदालतले ट्रम्पको आप्रवासन रोक खारेज गरिदिएपछि उनीहरु अमेरिका आउन पाएका थिए ।
ट्रम्पले कार्यकारी आदेशमार्फत सन् २०२० को भिसाको औचित्य समाप्त गरेकोमा संघीय अदालतले त्यसको बिरुद्धमा फैसला गरेपछि सेप्टेम्बरमा ४०४ जना नेपालीहरुले डाइभर्सिटी भिसा प्राप्त गरेका थिए । आर्थिक बर्ष २०२० का लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये झण्डै साढे १३ सय जना प्राथमिक डिभी विजेताहरुलेमात्र अमेरिकाको भिसा प्राप्त गर्न सफल भए । प्राथमिक डिभी विजेताहरु र उनीहरुका परिवारका सदस्यहरुसहित गतबर्ष २ हजार ८५ जना नेपालीहरुले डाइभर्सिटी भिसा पाउन सफल भएका थिए ।
तर आर्थिक बर्ष २०२१ का डिभी विजेताहरुको परीदृश्य सन् २०२० का डिभी विजेताहरुको तुलनामा अझ खराब भएको छ । प्रत्यक्ष रुपमा कुनै आप्रवासन रोक नभएपनि अमेरिकी सरकारको विदेश मन्त्रालयले दूतावासहरुलाई डाईभर्सिटी भिसालाई सबैभन्दा कम प्राथमिकतामा राख्न निर्देशन दिएपछि लोटरी विजेताहरुले भिसा पाउन सकेका छैनन् । अहिलेकै अवस्था कायम रहेमा सन् २०२१ का डिभी विजेताहरुले २०२० का विजेताले जति पनि भिसा नपाउने देखिएको छ ।
पासपोर्ट अनिवार्य गर्दा पनि २०२१ को डिभी लोटरी कार्यक्रममा ६ लाख ८८ हजार ५ सय २ जना नेपालीहरु सहभागी भएका थिए । प्राथमिक आवेदन दिने नेपालीहरु ४ लाख २१ हजार ७ सय ६५ जना रहेका थिए ।
उनीहरुका २ लाख ६६ हजार ७३७ परिवारका सदस्यहरुसहित सहित ६ लाख ८८ हजार ५ सय २ नेपालीहरु सन् २०२१ को डिभी कार्यक्रममा सहभागी भएका थिए । उनीहरुले सन् २०१९ को अक्टोबर २ देखि नोभेम्बर ५ सम्म डिभी लोटरीका लागि आवेदन दिएका थिए ।
नेपालमा कोरोनाको महामारी बढेपछि जारी लकडाउनका कारण अप्रिल २९ देखि अमेरिकी दूतावास काठमाडौंले भिसा अप्वाइन्टहरु रद्द गरेको छ । अन्य गैरआप्रवासी भिसा जारी गर्न रोकेको बेलामा समेत विना अन्तरवार्ता भिजिटर भिसाको नविकरण जारी राखेको अमेरिकी दूतावास काठमाडौंले अप्रिलमा मात्र ५०९ जनाको को भिजिटर भिसा नविकरण गरेको थियो ।
अधिकांश भिजिटर भिसा नविकरण भएपनि आपतकालिन अवस्थामा अमेरिका भ्रमण गर्नुपर्ने अवस्था भएकाहरुका लागि नयाँ भिसा पनि जारी गरिएको जनाइएको छ ।
आर्थिक बर्ष २०२१ का विजेताको टुंगो नलागेपनि डिभी २०२२ का विजेतालाई यथाशीघ्र डीएस २६० फर्म भर्न अमेरिकी दूतावासले काठमाडौंले सुझाव दिएको छ । दूतावासले भनेको छ तपाईंहरू मध्ये जतिजना डिभी २०२२को लागि छनौट हुन सफल हुनुभएको छ, हामी तपाईंलाई अनलाइनमा रहेको डीएस २६० फर्म यथाशीघ्र भर्नुहुन आग्रह गर्दछौं।
यो फर्म आवेदक आँफैले अनलाइनमा निशुल्क भर्न सक्ने र यसको लागि कुनै भिसा कन्सल्टेन्सीको सहयोग जरूरत नपर्ने पनि दूतावासले स्मरण गराएको छ ।