संसदको संयुक्त सदनमा पहिलो सम्बोधन गर्दै बाइडेन, प्रिस्कुल र कम्युनिटी कलेज निशुल्क बनाउने प्रस्ताव
प्रकाशित मिति : बैशाख १५, २०७८ बुधबार
अमेरिकी राष्ट्रपति जो बाइडेनले न्युयोर्क समय अनुशार आज राती ९ बजे संसदको संयुक्त सदनमा सम्बोधन गर्ने भएका छन् ।
बाइडेनले आजको सम्बोधनमा प्रिस्कुल र कम्युनिटी कलेजहरु निशुल्क गर्ने प्रस्ताव सहित १ दशमलव ८ ट्रिलियन डलरको योजना सार्वजनिक गर्ने ह्वाइटहाउसले जनाएको छ । साथै बाइडेनले आजको सम्बोधनमा चाइल्ड केयर ट्याक्स सुविधा बढाउने घोषणा गर्ने समेत अपेक्षा गरिएको छ ।
अमेरिकन फेमिलिज प्लान नामको यो प्रस्तावमा १५ बर्षका लागि खर्च कभर गर्न धनीहरुका लागि ट्याक्स बढाउने विषय समेत समावेश छ । यो प्रस्तावमा तीन र चारबर्षका सबैलाई प्रिस्कुल र दुईबर्ष निशुल्क कम्युनिटी कलेज प्रदान गर्ने उल्लेख छ । यो योजनामा सन् २०२५ सम्म नै संघीय चाइल्ड ट्याक्स क्रेडिट बढाउने र ट्याक्स क्रेडिट स्थायीरुपमा नै पूर्णरुपमा रिफण्ड हुने व्यवस्था गर्ने उल्लेख छ ।
हाउस स्पीकर न्यान्सी पेलोसीले संयुक्त सदनलाई सम्बोधनका लागि पठाएको निमन्त्रणा बाइडेनले स्वीकार गरेका हुन् । यो सम्बोधन आधिकारिक स्टेट अफ द युनियन सम्बोधन भने होइन । किनभने संसदसमक्ष राष्ट्रपतिको पहिलो सम्बोधनलाई स्टेट अफ द युनियन सम्बोधन मान्ने चलन छैन ।
‘झण्डै एकसयदिन अगाडि जब तपाईले कार्यभार सम्हाल्नुभयो । तब तपाईले ठूलो आशाको भावनाका साथ सहायता आउँदै गरेको प्रतिबद्धता जनाउनुभएको थियो । अहिले तपाईको ऐतिहासिक नेतृत्वको कारण सहायता आइसकेको छ ।’ पेलोसीले बाइडेनलाई लेखेको पत्रमा उल्लेख थियो ।
ह्वाइट हाउसले अफगानिस्तानबाट आगामी सेप्टेम्बर ११ सम्म सबै सेना फिर्ता गर्ने घोषणा गरेकै दिन पेलोसीको पत्र बाइडेनलाई प्राप्त भएको थियो । अमेरिकामा भएको सेप्टेम्बर ११ को आतंककारी हमलाको २० औं बार्षिकीमा अफगानिस्तानबाट सबै अमेरिकी सेना फिर्ता गर्ने ह्वाइट हाउसले घोषणा गरिसकेको छ ।
सपथ ग्रहण समारोहको सम्बोधन जस्तै संसद समक्ष बाइडेनको पहिलो सम्बोधनमा पनि कोरोना महामारी लगायतका विषय समेटिने छ । कोरोना महामारीका कारण सम्बोधनका क्रममा च्याम्बरमा सांसदहरुको संख्या सिमित गरिनेछ । बाँकीले हाउस फ्लोर र ग्यालरीमा बसेर सम्बोधन सुन्नेछन् । सांसदहरुका पाहुनालाई पनि अनुमति छैन ।
बाइडेन संयुक्त सदनमा सम्बोधन गर्न उत्सुक रहेको ह्वाइट हाउस प्रेस सेक्रेटरी जेन पास्कीले बताएकी छिन् । कोरोना महामारीसँगको लडाई, विश्वब्यापी चुनौतिहरुको सम्बोधन, आर्थिक रिकभरी लगायतका विषयमा छलफल हुने जनाइएको छ ।