राष्ट्रपति चुनाव र प्रतिनिधिसभाको सिट संख्या प्रभावित पार्नसक्ने अमेरिकी जनगणनाको नतिजा आज
प्रकाशित मिति : बैशाख १३, २०७८ सोमबार
इलेक्टोरल कलेज संख्या र अमेरिकी संसदको प्रतिनिधिसभाको सिट संख्यामा समेत परिवर्तन ल्याउनसक्ने अमेरिकी जनगणनाको पहिलो नतिजा आज सार्वजनिक गरिने भएको छ । न्युयोर्क समय अनुशार आज दिउसो ३ बजे जनगणनाको पहिलो नतिजा सार्वजनिक गर्न लागिएको हो । नतिजा जनगणना ब्यूरोको वेवसाइटमा पनि प्रकाशित गरिने भएको छ ।
२ लाख भन्दा बढी नेपालीहरु रहेको अनुमान गरिने अमेरिकामा जनगणनाले नेपाली र नेपाली मुलका अमेरिकनहरुको पनि आधिकारिक संख्या निर्धारण गर्नेछ । यसपटकको जनगणनामा नेपालीहरुको पनि उल्लेख्य सहभागिता रहेको थियो । विगतको जनगणनामा नेपालीहरुको सहभागिता कम रहेकाले संख्या कम देखिएको अनुमान गरिएको थियो ।
अमेरिकामा हरेक १० बर्षमा गरिने जनगणना कोरोना महामारीका बीचपनि गतबर्ष सम्पन्न भएको थियो । महामारीकै कारण जनगणनाको नतिजा सार्वजनिक हुनमा पनि ढिलाई भएको छ । अर्को दशकसम्मका लागि संसदको शक्ति सन्तुलन र इलेक्टोरल कलेजमा प्रभाव पार्नसक्ने भएकाले आज सार्वजनिक हुने नतिजालाई निकै चासोका साथ हेरिएको हो ।
वर्तमान संघीय कानून अनुशार जनगणनाको नतिजा सार्वजनिक गर्नुपर्ने सन् २०२० कै अन्तिमसम्म रहेको थियो । तर महामारीका कारण तोकिएको समयमा नतिजा सार्वजनिक गर्न नसकिने जनगणना ब्यूरोले चेतावनी दिदै आएको थियो । हालै दुईदलीय सांसदहरुको समुहले यो डेडलाइनलाई पछाडि सारेको थियो ।
आज सार्वजनिक गरिने नतिजामा जातीय, उमेर, लिंग, भाषा, देश लगायतका विवरणहरु भने उल्लेख नगरिने जनाइएको छ । यी विवरणहरुसहितको नतिजा दोश्रो चरणमा सार्वजनिक गरिने भएकाले आज सार्वजनिक गरिने नतिजाबाट नेपाली र नेपाली मुलका व्यक्तिको संख्या कुन राज्यमा कति रहेको छ भन्ने विवरणसमेत थाहा हुनेछ । उक्त तथ्यांक अगस्त १६ सम्म सार्वजनिक गरिने डेडलाइन रहेको छ ।