बाइडेनले सेप्टेम्बर ११ सम्म अफगानिस्तानबाट सबै अमेरिकी सेना फिर्ता गर्ने
प्रकाशित मिति : चैत्र ३१, २०७७ मंगलबार
अमेरिकी राष्ट्रपति जो बाइडेनले सेप्टेम्बर ११ सम्म अफगानिस्तानबाट सबै अमेरिकी सेना फिर्ता गर्ने भएका छन् । सेप्टेम्बर ११ को हमलाको २० औं बार्षिकीसम्म अफगानिस्तानबाट सबै अमेरिकी सेना फिर्ता गर्ने बाइडेन प्रशासनको योजना रहेको छ । सन् २००१ को सेप्टेम्बर ११ मा अमेरिकाको न्युयोर्कमा आतंककारी हमला भएको थियो ।
बाइडेनले अमेरिकी सेना फिर्तीबारेको विशेष घोषणा बुधबार गर्ने अपेक्षा गरिएको छ । गत बर्ष तालिवानसँगको वार्ताका क्रममा ट्रम्प प्रशासनले मे १ सम्म अफगानिस्तानबाट अमेरिकी सेना फिर्ता गर्ने डेडलाइन बनाएको थियो । उक्त डेडलाइनभन्दा केही महिना पछाडिसम्म अफगानिस्तानमा अमेरिकी सेना रहने भएका छन् ।
तालिवानले भने मे १ को डेडलाइनसम्म अमेरिकी सेना फिर्ता नभए नाटोका अधिकारी र अमेरिकामाथिको आक्रमण सुरु गर्ने चेतावनी दिएको छ । अब सेप्टेम्बर ११ को डेडलाइनको तालिवानले पालना गर्ने नगर्नेबारे भने अझै स्पष्ट छैन ।
आधिकारिक रुपमा अफगानिस्तानमा २५ सय अमेरिकी सेना रहेका छन् । यो संख्यामा घटीबढी हुने भएकाले अहिले त्यो भन्दा १ हजार बढी अमेरिकी सेना रहेको जनाइएको छ । त्यो बाहेक त्यहाँ झण्डै ७ हजार विदेशी सेना रहेका छन् र अधिकांश नाटो सम्बन्धित छन् ।
अफगानिस्तान युद्धमा २ हजारभन्दा धेरै अमेरिकी सेनाको मृत्यु भएको छ भने १ लाख बढी अफगान सर्वसाधारणहरु मारिएका छन् । युद्धमा अरबौंको क्षति भएको छ । केही अधिकारीहरुले भने अफगानिस्तानबाट अमेरिकी सेना फिर्ता हुँदा काबुल सरकार पतन हुने चेतावनी दिएका छन् ।