यो बर्ष बच्चा जन्माउनेलाई थप १४ सय डलरको राहत चेक, चाइल्ड ट्याक्स क्रेडिटवापत ३६ सय
प्रकाशित मिति : फाल्गुन २६, २०७७ बुधबार
सन् २०२१ भरमा बच्चा जन्माउनेले बच्चाका लागि थप १४ सय डलरको राहत चेक पाउने भएका छन् । बुधबार पारित १ दशमलव ९ ट्रिलियन डलरको प्याकेजमा २०२१ मा जन्मिने बच्चाका लागि समेत राहत चेकको व्यवस्था गरिएको छ ।
सन् २०२० मा जन्मिएका बच्चालाई समावेश गरेर यो बर्ष ट्याक्स फाइल गरेकाहरुले कुनै कदम नचाली बच्चाका लागि तेश्रो चरणको राहत चेक पाउनेछन् । तर सन् २०२१ मा जन्मिने बच्चाको सन्दर्भमा भने आगामी बर्ष ट्याक्स फाइल गर्दा रकम दावी गर्नुपर्नेछ ।
सन् २०२० मा जन्मिएको बच्चाका सन्दर्भमा विगतका दुईवटा राहत चेक ट्याक्स फाइल गर्दा रिबेटका रुपमा दावी गर्न सकिने प्रावधान रहेको छ । तेश्रो चरणको राहत चेक सबै उमेरका व्यक्तिलाई एउटै रकमको प्रदान गरिनेछ ।
दुबै सदनबाट पारित भइसकेको राहत प्याकेजमा राष्ट्रपति जो बाइडेनले शुक्रबार हस्ताक्षर गर्ने बताएका छन् । राहत प्याकेज अनुशार बाबुआमाहरु चाइल्ड ट्याक्स क्रेडिट स्वरुप ५ बर्षभन्दा कम उमेरका बच्चाका लागि ३६ सय डलर र ६ देखि १७ बर्षसम्मको बच्चका लागि ३ हजार डलरका लागि योग्य हुनसक्नेछन् ।
राहत प्याकेजमा १४ सय डलरको राहत चेक र बेरोजगारी विमाका अतिरिक्त साप्ताहिक ३ सय सय डलर सेप्टेम्बर ६ सम्म प्रदान गर्ने उल्लेख छ । त्यस्तै १ लाख ५० हजारभन्दा कम आम्दानी हुने परिवारको हकमा सुरुको १० हजार २ सय सम्मको सुविधा रकममा ट्याक्स नलाग्ने प्रावधान छ ।
राहत चेकको योग्यतामा परिवर्तन गरिएकाले ७५ हजारभन्दा कम आम्दानी हुनेहरुले राहत चेकको पूर्ण अंश प्राप्त गर्नेछन् । तर ८० हजारभन्दा बढी आम्दानी हुनेहरुले पनि राहत चेकको कुनै पनि अंश प्राप्त नगर्नेगरी सहमति कायम भएको छ । त्यस्तै दम्पत्तिको सन्दर्भमा १ लाख ५० हजारभन्दा कम आम्दानी हुनेहरुले पूरै राहत चेक पाउनेछन् तर १ लाख ६० हजारभन्दा धेरै आम्दानी हुनेहरुले चेकको कुनै पनि अंश पाउनेछैनन् ।
घरमूलीका सन्दर्भमा १ लाख १२ हजारभन्दा कम आम्दानी हुनेहरुले पूरै १४ सय पाउनेछन् तर १ लाख २० हजारभन्दा बढी आम्दानी हुनेहरुले कुनै रकम पाउनेछैनन् । थ्रेसहोल्ड भन्दा बढी आम्दानी हुनेहरुले पाउने राहत चेकको रकम घट्दै जाने हिसाबका लागि पनि नयाँ बिधिको प्रयोग गरिने भएको छ ।