टेक्सासमा विहिबार विहानसम्म खराब मौषमको चेतावनी, २५ को मृत्यु, नेपाली समेत प्रभावित
अमेरिकामा नेपालीहरुको बाक्लो बसोबास रहेको टेक्सासमा खराब मौषमबाट नेपालीहरु पनि प्रभावित भएका छन् । कतिपय नेपालीहरुले विद्युत आपूर्तिमा अवरोध उत्पन्न भएका कारण अन्धकार र चिसोमा बस्नुपरेको गुनासो गरेका छन् भने कतिपय नेपालीहरुले प्रभावित क्षेत्रमा रहेकाहरुको चिन्ता गरेका छन् ।
अमेरिकामा न्युयोर्क र क्यालिफोर्नियापछि नेपालीहरुको सबैभन्दा धेरै बसोबास टेक्सासमा रहेको छ । अमेरिकामा सबैभन्दा धेरै नेपाली विद्यार्थीहरुको बसोबास पनि टेक्सासमा नै रहेको छ । टेक्सासमा खराब मौषमका कारण लाखौं घरमा विद्युत आपूर्तिमा अवरोध उत्पन्न हुँदा त्यसको मारमा नेपालीहरु पनि परेका हुन् ।
टेक्सासबाट खसोखास गु्रपमा सुरेश शर्मा लेख्छन् – ‘सुरक्षित रहनुहोला भन्न सजिलो छ तर बस्न गाह्रो रहेछ । बिजुली छैन । चिसोपन कोठा भित्र र बाहिर बराबर पुग्न लाग्यो । आफ्नो भन्दा पनि होमलेसहरुको चिन्ता बढी लागेको छ । भगवानसँग प्राथना गरेका बसेका छौं ।’
खराब मौषमका कारण र अर्को आँधीको चेतावनीका कारण चिन्ता अझ बढेको टेक्सासबाट संचारकर्मी सूर्य थापाले जानकारी दिए । टेक्सासमा रहेका नेपालीहरु खराब मौषमका कारण प्रभावित भएको खबर आएपनि कुनै अप्रिय खबर भने नरहेको थापाले जानकारी दिए । बुधबार थप हिमपातको सम्भावना भएकाले अझ खराब मौषमका लागि तयार रहेको उनले बताए ।
आज डायलस, फोर्ट वर्थ लगायत उत्तरी र मध्य टेक्सासका क्षेत्रमा बेलुका ६ बजेदेखि बिहिबार विहान ६ बजेसम्मका लागि शीतआँधीको चेतावनी दिइएको छ । माइनस १५ डिग्रीसम्मको अत्यन्तै खतरनाक चिसो हावा चल्ने र कतिपय स्थानमा ६ इन्चसम्म हिमपात हुने अनुमान गरिएको छ ।
अधिकांश स्थानमा भने ३ इन्चसम्म हिमपातको सम्भावना छ । सडकहरुमा बरफ जम्ने भएकाले बाटाहरु चिप्ला हुनेछन् । उत्तरी र मध्य टेक्सासमा मौषम चेतावनीहरु जारी गरिएको हो । अरु थप घरमा विद्युत आपूर्तिमा अवरोध हुनसक्ने चेतावनी दिइएको छ भने यात्रा खतरनाक हुनसक्ने भएकाले सावधानी अपनाउन भनिएको छ । मंगलबार बेलुकादेखि बुधबार दिउसोसम्म सकभर यात्रा नगर्न सुझाव दिइएको छ ।
सकभर बाहिर नजान र जानै परे न्यायो कपडा लगाउन सुझाव दिइएको छ । त्यस्तै गाडीलिएर बाहिर जानुपरेमा गाडीमा अतिरिक्त पानी, खाद्यान्न र फ्लासलाइट राख्न सुझाव दिइएको छ ।
टेक्सासमा कम्तीमा ४२ लाख घरमा विद्युत आपूर्तिमा अवरोध उत्पन्न भएको छ भने कारभित्र तातो बनाउन खोज्दा कार्बन मोनोक्साइडबाट एक बच्चासहित टेक्सासमा दुईजनाको मृत्यु भएको छ । बिहिबारयतामात्र मौषम सम्बन्धित कारणबाट २५ जनाको मृत्यु भएको छ भने अधिकांश टेक्सास निवासी छन् ।
कभर फोटो: सन्ध्या गौतम/टेक्सास
