न्युयोर्कमा सोमबार विहान ६ बजेदेखि २४ घण्टा बाहिर निस्कन रोक लगाउने स्थानीय संकटकाल
न्युयोर्कका मेयर बिल डे ब्लाजिओले स्थानीय संकटकालिन घुमफिर प्रतिबन्धको घोषणा गरेका छन् । आजदेखि सुरु भएको हिमपात र आँधी सोमबार दिनभर जारी रहने सम्भावनाका कारण सोमबार विहान ६ बजेदेखि मंगलबार विहान ६ बजेसम्म अत्यावश्यक बाहेकका अन्य घुमफिरमा प्रतिबन्ध लगाइएको छ ।
स्थानीय मौषम संकटकाल घोषणामा आपतकालिन अवस्थामा बाहेक अन्य अवस्थामा बाहिर निस्केर घुमफिर गर्नमा रोक लगाइएको छ । न्युयोर्क सिटीमा २२ इन्चसम्म हिमपात हुने र सिटीभर हिमआँधीको जस्तै अवस्था हुने मौषमविदहरुको चेतावनी रहेको छ ।
मेयर बिल ब्लाजिओले यो हिमआँधीले भारी हिमपात ल्याउने भएकाले कुनै गल्ती नगर्न चेतावनी दिएका छन् । साथै हिमपातका कारण यात्रा खतरनाक हुने उनको भनाई छ । न्युयोर्कबासीहरुलाई घरभित्रै बस्न उनले सुझाव दिएका छन् । साथै आपतकालिन गाडीहरुका लागि बाटो खुला राख्न र हिउँ सोहोर्ने गाडीलाई राम्रोसँग काम गर्ने वातावरण बनाउन ब्लाजिओले आग्रह गरेका छन् ।
यो आदेश सोमबार विहान ६ बजेदेखि लागु हुने र अनिवार्य कार्यान्वय हुने भएकाले त्यो अगाडि नै आवश्यक तयारी गर्न सुझाव दिइएको छ । सोमबार विहान १० बजेदेखि हरेकघण्टा न्युयोर्क सिटीमा २ देखि ४ इन्चसम्म हिमपात हुने अनुमान गरिएको छ । न्युयोर्क सिटीमा प्रतिघण्टा ५० माइलसम्म हुरी चल्ने अनुमान गरिएको छ ।
सार्वजनिक यातायातमा काम गर्ने कामदारहरु, फस्ट रेस्पोण्डरहरु, हेल्थकेयर र होमकेयर कामदारहरु, प्रहरी अधिकारीहरु, शान्ति अधिकारीहरु, अत्यावश्यक सिटीको सेवामा संलग्न कामदारहरुलाई भने छुट दिइएको छ ।
त्यस्तै खाना, औषधी र इन्धन डेलिभरी गर्नेहरु, संचारमाध्यमहरु, होटलका कामदारहरु, होमलेस सेल्टरमा काम गर्नेहरु र आउटरिच कामदारहरु, आपतकालिन मर्मतमा खट्ने युटिलिटी कामदारहरुलाई छुट दिइएको छ ।
फार्मेसी, ग्रोसरी स्टोर, खाना तथा बेभरेज स्टोर, कन्भिनियन्स स्टोर, ग्यास स्टेशन, लण्ड्री, होटल, रेष्टुरेण्ट, बार र हार्डवेयर स्टोरमा काम गर्नेहरु, औषधी उपचार वा औषधीका सामाग्री किन्न निस्केकाहरु, कार्यस्थलबाट कामदारलाई लिन लैजाने प्रयोग हुने गाडीहरुलाई पनि छुट दिइएको छ ।
त्यो बाहेक अरु सबैलाई बाहिर निस्कन प्रतिबन्ध लगाइएको छ ।
