अमेरिकामा कोरोनाबिरुद्धको भ्याक्सिनका एकमहिना, १ करोड बढीले पाए भ्याक्सिन
प्रकाशित मिति : पुस २९, २०७७ बुधबार
न्युयोर्कमा कोरोनाबिरुद्धको भ्याक्सिन लगाउँदै ल्याब टेक्निसियन रायन लाम्गादे ।
❒ डिसेम्बर १४ यता अमेरिकामा कोरोनाबिरुद्धको भ्याक्सिन प्राप्त गर्नेको संख्या एककरोड बढी, २ करोड ९३ लाख भन्दा बढी डोज डेलिभर
❒ न्युयोर्क राज्यमा झण्डै १८ लाख भ्याक्सिनका डोजहरु डेलिभर, झण्डै साढे ६ लाखलाई भ्याक्सिनको पहिलो डोज प्राप्त
❒ न्युयोर्क सिटीभित्र ८ लाख डोजहरुमात्र डेलिभर, पहिलो डोज लगाउनेहरु जम्मा २ लाख ३७ हजार, दोश्रो डोज समेत पाउनेहरु झण्डै ३० हजार
❒ खसोखासमा थप समाचारहरुका लागि यहाँ क्लीक गर्नुहोला ।
अमेरिकामा गत डिसेम्बर १४ बाट कोरोनाबिरुद्धको भ्याक्सिन लगाउन सुरुवात गरिएको थियो । जनवरी १४ मा भ्याक्सिन लगाउन सुरु गरेको एकमहिना पुग्दैछ । यो अवधिमा कोरोनाबिरुद्धको भ्याक्सिन प्राप्त गर्नेको संख्या एककरोड नाघेको छ ।
जनवरी १३ विहान ९ बजेसम्मको सीडीसीको तथ्यांक अनुशार अहिलेसम्म अमेरिकामा १ करोड २ लाख ७८ हजार ४ सय ६२ ले कोरानाबिरुद्धको भ्याक्सिनको पहिलो डोज प्राप्त गरिसकेका छन् । अमेरिकाभर २ करोड ९३ लाख भन्दा बढी डोज डेलिभर भइसकेको छ । आजविहान सम्मको तथ्यांक अनुशार २ करोड ९३ लाख ८० हजार १ सय २५ डोज भ्याक्सिन डेभिभर भइसकेको छ ।
न्युयोर्कमा झण्डै १८ लाख भ्याक्सिनका डोजहरु डेलिभर गरिएको छ भने झण्डै साढे ६ लाखले भ्याक्सिनको पहिलो डोज प्राप्त गरिसकेका छन् । भ्याक्सिन प्राप्त गर्ने नेपाली र नेपाली अमेरिकनहरुको संख्या पनि उल्लेख्य रहेको छ । न्युयोर्कमा ६५ बर्ष माथिका र ग्रोसरी स्टोरमा काम गर्नेहरुका लागि पनि भ्याक्सिन वितरण सुरु भइसकेको छ ।
जनवरीभरमा न्युयोर्क सिटीमा बस्ने १० लाखलाई कोरोनाबिरुद्धको भ्याक्सिन दिइने मेयर बिल डे ब्लाजिओले बताएका छन् । तर यो लक्ष्य पूरा हुनेमा भने आशंका रहेको छ । किनभने अहिलेसम्म न्युयोर्क सिटीभित्र ८ लाख डोजहरुमात्र डेलिभर गरिएको छ भने पहिलो डोज लगाउनेहरु जम्मा २ लाख ३७ हजारमात्र रहेका छन् । न्युयोर्कमा दोश्रो समेत डोज पाउनेहरु झण्डै ३० हजार छन् ।
न्युयोर्क सिटीको जनसंख्या झण्डै ८० लाख रहेको छ । झण्डै साढे ५ लाखमा कोरोना संक्रमण पुष्टी भइसकेको छ ।
अमेरिकामा मार्चसम्म ३ सय मिलियन डोज उपलब्ध गराइने भएको छ । अमेरिकाले फाइजरका थप १ सय मिलियन डोज किन्ने सहमति गरेको छ । जस अन्तरगत जुनसम्म ७० मिलियन र जुलाईमा बाँकी भ्याक्सिनका डोजहरु फाइजरले प्रदान गर्नेछ ।
अमेरिकाले फाइजर र मोडेर्नाका ४ सय मिलियन डोज भ्याक्सिन प्राप्त गर्नेछ । डिपार्टमेन्ट अफ हेल्थ एण्ड ह्युमन सर्भिसेजका अनुशार अमेरिकी सरकारसँग थप ४ सय मिलियन भ्याक्सिनका डोजहरु किन्नसक्ने विकल्प समेत रहेको छ ।