अमेरिकामा ४२ लाख बढीलाई भ्याक्सिन, दैनिक १० लाखलाई दिन फाउचीको जोड
प्रकाशित मिति : पुस २०, २०७७ सोमबार
अमेरिकामा ४२ लाख भन्दा धेरैले कोरोनाबिरुद्धको भ्याक्सिनको पहिलो डोज लगाइसकेको अमेरिकन सीडीसीले जनाएको छ । भ्याक्सिन लगाउनेहरुको अन्तिम संख्या गणना भइरहेकाले यो संख्या अझै बढी हुनसक्ने अनुमान गरिएको छ । अहिलेम्म १ करोड ३० लाख ७१ हजार ९ सय २५ डोज भ्याक्सिन डेलिभर भइसकेको सीडीसीले जनाएको छ ।
विज्ञहरुले भ्याक्सिन लगाउने कामलाई तीब्रता दिन सुझाव दिएका छन् । अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले अमेरिकाले हरेक दिन १० लाखलाई भ्याक्सिन लगाउनुपर्ने बताएका छन् ।
फाउचीले अहिलेको भ्याक्सिन लगाउने दर दोब्बर बनाउन भनेका छन् । डिसेम्बरभित्रमा २० मिलियन डोज डेलिभर हुने बताइएपनि लक्ष्य अनुशार काम भएको छैन । ट्रम्प प्रशासनले डिसेम्बरभित्र २० मिलियनलाई भ्याक्सिनको पहिलो डोज प्राप्त हुने बताएकोमा उक्त लक्ष्य एक चौथाई पनि पूरा भएको छैन ।
दीर्घकालिन हेरचाह केन्द्रमा २२ लाख डोज भ्याक्सिन पुगिसकेको छ भने २ लाख ८२ हजारलाई पहिलो डोज दिइसकिएको छ । अमेरिकामा ५० वटै राज्य र भूभागहरुमा भ्याक्सिन वितरण भइरहेको छ ।
न्युयोर्कमा झण्डै ८ लाख भ्याक्सिनका डोजहरु डेलिभर गरिएको छ भने झण्डै साढे २ लाखलाई पहिलो डोज दिइसकिएको छ । टेक्सासमा झण्डै १० लाख डोज डेलिभर भइसकेको छ भने झण्डै साढे २ लाखलाई पहिलो डोज दिइसकिएको छ ।
अमेरिकामा डिसेम्बर १४ बाट फाइजरको र डिसेम्बर २१ बाट मोडेर्नाको भ्याक्सिन वितरण सुरु गरिएको हो । नवनिर्वाचित अमेरिकी राष्ट्रपति जो बाइडेनदेखि पदावधि सकिदै गरेका उपराष्ट्रपति माइक पेन्स सम्मले भ्याक्सिन लगाइसकेका छन् ।
पहिलो चरणको पहिलो उपचरणमा अमेरिकामा फ्रन्टलाइनमा खट्ने स्वास्थ्यकर्मी र दीर्घकालिन हेरचाह केन्द्रमा रहेकाहरुलाई भ्याक्सिन दिइएको छ । यो उपचरणमा भ्याक्सिन पाउनेमा अमेरिकामा रहेका नेपाली स्वास्थ्यकर्मीहरुको संख्या पनि उल्लेख्य रहेको छ । उनीहरुलाई भ्याक्सिनको पहिलो डोज दिइएको हो ।
दोश्रो उपचरणमा भ्याक्सिन पाउनेहरुमा ७५ बर्ष र त्योभन्दा माथिका व्यक्ति तथा अग्रपंक्तिमा खटिने अत्यावश्यक कामदार रहेका छन् । त्यस्तै पहिलो चरणको तेश्रो उपचारणमा ६५ देखि ७५ बर्षसम्मकालाई भ्याक्सिन दिइने भएको छ । त्यस्तै १६ देखि ६४ बर्षसम्मका स्वास्थ्य समस्या भएकाहरु र अन्य अत्यावश्यक कामदारहरुलाई यो उपचरणमा राखिएको छ ।
अबको चरणमा भ्याक्सिन पाउनेहरु प्रहरी, अग्नीनियन्त्रक, शिक्षक, ग्रोसरी स्टोरमा काम गर्नेहरु, खाद्य र कृषि कामदारहरु, उत्पादन कामदारहरु, जेलमा काम गर्नेहरु, हुलाकमा काम गर्नेहरु र सार्वजनिक यातायातमा काम गर्नेहरु हुनेछन् । यो संख्या अमेरिकामा झण्डै ३० मिलियन रहेको छ ।
त्यसपछिको चरणमा भ्याक्सिन पाउनेहरुमा जनस्वास्थ्य कामदारहरु, यातायात र लजिस्टिकमा काम गर्नेहरु, खाद्य सेवामा काम गर्नेहरु, निर्माणमा काम गर्नेहरु, बित्त क्षेत्रमा काम गर्नेहरु, आईटी र संचारमा काम गर्नेहरु, उर्जामा काम गर्नेहरु, मिडियामा काम गर्नेहरु, कानुनी क्षेत्रमा काम गर्नेहरु, सार्वजनिक सुरक्षा इन्जिनियरहरु, पानीका क्षेत्रमा काम गर्नेहरु हुनेछन् ।
यो चरणमा भ्याक्सिन पाउने स्वास्थ्य समस्या भएकाहरुमा मोटोपन भएकाहरु, दोश्रो प्रकारको मधुमेह भएकाहरु, दीर्घकालिन पल्मोनरी रोग भएकाहरु, मुटु र मृगौलाका रोगीहरु, अंग प्रत्यारोपण गरेकाहरु, गर्भवती र धुमपानका अम्मलीहरु पर्नेछन् । यो संख्या अमेरिकामा झण्डै ५७ मिलियन रहेको छ ।
पहिलो चरणको दोश्रो उपचरण फरबरीभन्दा अगाडि भने सुरु हुने अपेक्षा गरिएको छैन ।
मार्चसम्म ३ सय मिलियन डोज उपलब्ध गराइने लक्ष्य भएपनि उक्त लक्ष्य पूरा हुनेमा भने आंशका रहेको छ । अमेरिकाले फाइजरका थप १ सय मिलियन डोज किन्ने सहमति गरेको छ । जुनसम्म ७० मिलियन र जुलाईमा बाँकी भ्याक्सिनका डोजहरु फाइजरले प्रदान गर्नेछ ।