अमेरिकी उपराष्ट्रपति पेन्सले शुक्रबार सार्वजनिक रुपमा कोरोनाबिरुद्धको भ्याक्सिन लगाउने
बहिर्गमन उन्मुख अमेरिकी उपराष्ट्रपति माइक पेन्सले शुक्रबार सार्वजनिक रुपमा नै कोरोनाबिरुद्धको फाइजर भ्याक्सिन लगाउने भएका छन् । नवनिर्वाचित अमेरिकी राष्ट्रपति जो बाइडेनले भने आगामी साता भ्याक्सिन लगाउने तयारी गरिहेका छन् ।
माइक पेन्स ह्वाइट हाउसको कोरोना भाइरस टास्कफोर्सका प्रमुख समेत हुन् । अमेरिकनमाझ भ्याक्सिनप्रतिको विश्वास बढाउन पेन्सले शुक्रबार सार्वजनिक रुपमा नै भ्याक्सिन लगाउन लागेको ह्वाइटहाउसबाट जारी वक्तब्यमा जनाइएको छ ।
शुक्रबारको कार्यक्रममा माइक पेन्सकी पत्नी करेन पेन्स र सर्जन जनरल जेरोम आदम्सले पनि भ्याक्सिन लगाउने भएका छन् । भ्याक्सिन लगाउने कार्यक्रम ह्वाइट हाउसमै हुने भएको छ ।
आफू लाइनमा अगाडि जान नचाहेको भएतापनि अमेरिकनलाई भ्याक्सिन लिनु सुरक्षित रहेको सन्देश दिनका लागि आगामी साता भ्याक्सिन लिन लागेको बाइडेनले बताएका छन् । बाइडेनले भ्याक्सिन लगाएको भिडियो पनि सार्वजनिक रुपमा देखाइने भएको छ ।
यस अगाडि अमेरिकाका बरिष्ठ सरुवा रोग विशेषज्ञ डाक्टर एन्थोनी फाउचीले नवनिर्वाचित अमेरिकी राष्ट्रपति बाइडेन र उपराष्ट्रपति कमला ह्यारिसलाई यथाशीघ्र भ्याक्सिन लगाउनुपर्ने बताएका थिए । ह्वाइट हाउसमा प्रवेशको समयमा कुनै समस्या उत्पन्न हुन नदिनका लागि यसो गर्नु आवश्यक रहेको फाउचीले बताएका थिए ।
गत शुक्रबार कोरोनाबिरुद्धको फाइजर र बायोएनटेकले बनाएको भ्याक्सिन प्रभावकारी र सुरक्षित ठहर गर्दै प्रयोगका लागि अमेरिकाको खाद्य तथा औषधी प्रशासन एफडीएले अनुमति दिएको थियो । त्यसपछि सोमबारबाट अमेरिकामा भ्याक्सिन लगाउन सुरु गरिएको छ ।
फाइजरको भ्याक्सिन १६ बर्षभन्दा माथिकालाई प्रयोगका लागि स्वीकृत गरिएको हो । फाइजरको भ्याक्सिन माइनस ७६ डिग्री फरेनहाइट र त्योभन्दा चिसोमा राख्नुपर्छ ।
फाइजरको कोभिड १९ भ्याक्सिन अमेरिकामा प्रयोगको स्वीकृति पाउने पहिलो भ्याक्सिन हो । अमेरिकाले आगामी मार्चभित्र १ सय मिलियनलाई भ्याक्सिन लगाउने योजना बनाएको छ ।
फाइजरको भ्याक्सिन एउटामात्र डोजपछि भ्याक्सिनले कोरोना संक्रमण हुनबाट ८२ प्रतिशतसम्म रोक्न प्रभावकारी हुने जनाइएको छ । तर दुबै डोज दिएपछि भने ९५ प्रतिशतसम्म प्रभावकारी हुनेछ ।
फाइजर र बायोएनटेकको खोपले आनुवंशिक कोडहरूलाई प्रयोग गरेर रोग प्रतिरोधी प्रतिक्रिया निम्त्याउँछन् र यसलाई एमआरएनए खोप भनिन्छ। यसले मानव कोषमा फेरबदल गर्दैन बरू शरिरलाई कोभिड विरुद्ध प्रतिरोधी हुन तयार रहने हिसाबको निर्देशन दिन्छ।
